СИКТСА ГАЗЕТӦ ГИЖЫСЬ — ОТСАСЬЫСЬ КОММУНИСТ ПАРТИЯЛЫ

Газетӧ сиктъяссянь гижысьяс СССР пасьта ӧні ёна содісны. Газетъясӧ ӧні гижӧны оз ӧтка крестьяна, гижӧны унаӧн. Став Союз пасьтаыс газетъясӧ гижысь эм нин 85 сюрс сиктса морт.

Коммунист партиялӧн 13-ӧд съездыс шуис сиктса гижысьяслы уджсӧ нуӧдны отсавны быд коммунист да комсомол ячейкасянь, профсоюзъяссянь да сӧвет учрежденньӧяссянь; тшӧктіс крестьяна гижӧдъяс вылӧ ёна видзӧдны. Ставсоюзса коммунист партиялӧн 14-ӧд конференцияыс сідзжӧ тшӧктіс быд ногыс отсавны рабочӧй да крестьяна газетӧ гижысьяслы.

Выль сӧвет сиктлы, лыддьысян керкалы, коммунист да комсомол ячейкалы, уна переменаӧн му уджалӧмлы сиктъясын эмӧсь паныд мунысь йӧз. Налы оз сьӧлӧм вылас во рабочӧйлӧн да крестьяналӧн власьтыс, сӧвет законъясыс, найӧ сиктса оласногсӧ кыскӧны водзӧ пыдди бӧрӧ, важланьӧ. Татшӧм йӧзыс уналаын сюйсьӧмаӧсь сельсӧветъясӧ, волисполкомъясӧ да мукӧд сиктса удж нуӧданінъясӧ, мукӧдыс весиг слӧймӧмаӧсь пырны коммунист партияӧ. Сэтӧні найӧ вӧчӧны уна лёк удж, сиктъясын падмӧдӧны коммунист партиялысь да Сӧвет власьтлысь лӧсьӧдӧм уджсӧ.

Сиктса газетӧ гижысь вӧчӧ выль олӧм. Сійӧ отсалӧ лӧсьӧдны сиктъясын выль оласног.

Сійӧ водзсасьӧ сиктын став омӧль уджъяскӧд, лёк вӧчысь йӧзъясыскӧд. Мед сійӧ ёнджыка гӧгӧрвоас, аддзас бур уджсӧ да лёк уджсӧ сиктъясын, мед ёнджыка вермас отсавны коммунист партиялы да Сӧвет власьтлы, газетӧ гижысьлӧн колӧ югдӧдчыны, Сӧвет власьт да коммунист партия уджӧн тӧдмасьны. Сы вӧсна сиктса партийнӧй ячейкаяслы колӧ зільны кыскыны газетӧ гижысьӧс аслас собранньӧяс вылӧ, обществоса уджӧ, аслас велӧдчан кружокъясӧ, быд ногӧн отсавны газетӧ гижысьлы велӧдчыны да газетӧ гижны.

Газетӧ гижысьяслы колӧ ӧтувтчыны кружокъясӧ. Кружокъясыслӧн уджыс — кыскыны унджык крестьянаӧс газетӧ гижны, а сэсся коммунист партияӧ.

Газетӧ гижысьяс водзын зэв ыджыд, зэв сьӧкыд удж. Налы колӧ велӧдны асьсӧ да аслас бура уджалӧмӧн кыскыны став крестьянасӧ Сӧвет власьт бердӧ.

Ф. Лукоянов.