СЕТӦЙ ТУЙ НЫВБАБАЛЫ

Партия ӧні сиктъясын зільӧ кыскыны обществоса уджӧ унджык крестьянаӧс. Сійӧ уджсӧ медъёна нин колӧ нуӧдны сиктса нывбабаяс пытшкын. Сиктса нывбабаыд ёна на пемыд, дзескӧдӧны на сійӧс, пыдӧ на сылы пырӧма важ оласногыс. Сӧмын тайӧ бӧръя воясас нывбабаяс ёна кутісны водзмӧстчыны, мунны югыдлань, кутчысьны обществоса уджӧ.

Колян во зэв нин бура мунісны быдпӧлӧс нывбаба конференцияяс, съездъяс, собранньӧяс. Воддза вояс дорысь ёна нин унаӧн сійӧ конференцияяс, съездъяс вылас волывлісны нывбабаяс. Медся нин тӧдчӧ волывлӧмыс сиктса крестьяна скодъяс вылӧ сӧветъясӧ бӧрйысигӧн. Мукӧдлаас нывбабаыс собранньӧ вылас вӧлі джынйыс дай унджыкӧн джынсьыс. Мукӧдлаас сиктса сӧветъясас бӧрйысьӧм ужсӧ ставсӧ нуӧдісны нывбабаяс. Найӧ чукӧртавлісны водзвыв собранньӧяс, сэтӧні бӧръялісны кандидатъясӧс сӧветъясас, зілисны асьныс кандидатъяссӧ нуӧдны сӧветас. Асланыс кандидатъяс пиын налӧн эз вӧвны сӧмын нывбаба, на пиын унаӧн вӧлаліны бур вежӧра крестьяна. Сэсся кызысьсӧ нывбаба гӧлӧсуйтісны коммунистъяслы. Кулакъяслы пыр вӧлі паныд сувтӧны.

Крестьяна пыр на зэв кӧсӧя видзӧдӧны нывбаба бӧрйысьӧм вылӧ. Медъёнасӧ нин сӧветъясӧ бабаясӧс бӧрйӧмлы паныд мунӧны озыр крестьяна да кулакъяс. Кулакъясыс быд ногӧн нин торкӧны нывбабаяслысь уджсӧ.

Колян бӧрйысьӧмас сӧветъясӧ нывбабаяс ёна нин мунісны водзӧ воддза вояс серти. Ӧнія бӧрйысигӧн сельсӧветъясӧ да волисполкомъясӧ СССР пасьта веськалі 60.000 морт.

Крестьяна важ бӧрысь ёна нин югді, вежӧра лои. Кужан кӧ индыны сылы веськыд уджалан туй, сійӧ уна буртор вермас вӧчны Сӧвет государствоын выль нога сикт лӧсьӧдігӧн. Сы вӧсна сиктса удж нуӧданінъяслы колӧ чорыдджыка нуӧдны нывбабаяс пӧвстын югдӧдан удж, кыскыны найӧс обществоса уджӧ да коммунист партияӧ.

Нывбаба пӧвстын уджалӧм да партияӧ босьтӧм.

Мед вермас бура мунны нывбаба пӧвстын югдӧдан удж, колӧ найӧс войдӧр велӧдны лыддьысьны-гижны. Та боксянь миян уджыс зэв на омӧля мунӧ. Нывбабаяс мужикъяс дорысь омӧля ветлӧдлӧны велӧдчыны гижны-лыддьысьны, лыднас эськӧ нывбаба пытшкас велӧдчытӧмыс унджык да. Зэв унатор на торкӧны крестьянаӧс велӧдчӧмысь: гӧльлун, уна челядь, мукӧддырйиыс велӧдчаніныс зэв ылын да сідз водзӧ. Сэсся кӧнсюрӧ крестьянкаясӧс томджык велӧдчысьяс ёна сералӧны да, сы вӧсна мукӧддырйиыс нывбабаыд дзикӧдз дугдӧ велӧдчыныд ветлӧмсьыд.

Нывбабаясӧс югдӧдан удж сиктъясын зэв жӧ омӧля мунӧ, абу сиктъясад бура уджалысьясыд да коммунист ячейкаясыд да.

Помас ещӧ кымынкӧ кыв висьтала нывбабаӧс коммунист партияӧ кыскӧм йылысь. Сійӧ удж миян мунӧ омӧлика жӧ. Крестьянкаяс зэв омӧля пырӧны партияӧ. Партияӧ пырӧм нывбаба ӧтка на.

Мукӧдлаын 7000 гӧль крестьянка вылӧ воӧ сӧмын 5 коммунистка.

Сиктса коммунист ячейкаяс нывбабаясӧс партияӧ босьтігӧн налысь корӧны ёна политграмота тӧдӧм, заявленньӧяссӧ налысь видлавтӧг дыр кутӧны, сэсся нывбабаяслы рекомендуйтысьыс озджык сюр.

Медбӧръяыс зэв нин омӧль, ёна торкӧ нывбабалы партияӧ пыригӧн. Мукӧддырйиыс коммунистъяс тшӧтш зэв кӧсӧя на видзӧдӧны нывбабаӧс общественнӧй уджӧ кыскӧмӧ. Сы вӧсна ёна нин сьӧкыд корсьны рекомендациятӧ.

Оз ков вунӧдны 14-ӧд конференциялысь шуӧмъяссӧ — восьтыны паськыдджыка коммунист партияӧ нывбабаяслы ӧдзӧсъяссӧ.

С. Губерман.