ДЗОР ГУСЯСЬЫСЬЯС

1923 воӧ декабр тӧлысьын Межӧг кооперативысь правленньӧыс да приказчикыс мунісны сиктъясӧ вузасьны. Лавкасӧ видзӧдысьыс некод эз коль. Сэк кості кык Межӧгса старик — Минин Микайлӧ Ӧлексеевич да Митрошин Павел Микайлович — жугӧдӧмаӧсь лавка ӧшиньсӧ, пырӧмаӧсь лавкаас да петкӧдӧмаӧсь кутшӧмсюрӧ тӧвар 570 шайт дон кымын.

Вит тӧлысь мысти гусялӧм бӧртиыс Мининлӧн пиыс кутӧма гӧтрасьны да гусялӧм кӧлуйсьыс вурӧма аслыс паськӧм. Сы серти и сюрины гусясьысьясыс. 446 шайт доныс тӧварыс бӧр сюри: кодыс обыск дырйи да, кодсӧ асьныс вайисны да.

Гусялӧм тӧвартӧ юклӧмаӧсь ас костас Митрошин, сылӧн бабаыс да налӧн куим ныв, сэсся Минин дай сылӧн пиыс. Митрошиныслы 60 арӧс, Мининыслы 55 арӧс. Ставнысӧ найӧс сетісны судӧ. Юль квайтӧд лунӧ обласьтувса суд Айкатылаын видлаліс налысь делӧсӧ. Митрошин да Минин лыддьӧны асьнысӧ мыжаясӧн, сӧмын шуӧны, гӧль вӧсна пӧ гусялім. Суд судитіс Митрошинӧс да Мининӧс куим во кежлӧ пукӧдны став правасӧ босьтӧмӧн, мукӧдсӧ судитіс куим во кежлӧ жӧ условнӧ.