СЕЛЬХОЗНАЛОГ МЫНТЫНЫ ПОЗЬӦ ПОШТА ВЫЛӦ
Таво колян вося серти сельскокӧзяйственнӧй налог мынтӧм крестьяналы ещӧ на кокньӧдӧма.
Кольӧм вося моз жӧ, налог кутас мынтыссьыны волисполкомъясӧ. Позьӧ кольӧм вося моз уна крестьяналы налогсӧ мынтыны ӧтувтчӧмӧн.
Та кындзи, таво налог позьӧ мынтыны быд поштӧвӧй контораын. Быд налог мынтысь любӧй поштӧвӧй контораӧ, ачыс кӧні олӧ, вермас сетны налогсӧ мыйта воӧ сы вылысь. Позьӧ тшӧтш сылы налогсӧ мынтыны мукӧд пыдди. Шуам, кутшӧмкӧ морт служитӧ Сыктывдінкарын либӧ мукӧд карын. Окотитас кӧ сійӧ, вермас мынтыны налогсӧ аслас батьыслысь, вокыслысь, кодъяс олӧны кутшӧмкӧ сиктын.
Пошта босьтӧ налог сьӧмӧн дай крестьяналысь воана удждысьӧм облигацияясӧн.
Пошта пыр сьӧм позьӧ мӧдӧдны поштаӧн либӧ телеграммаӧн переводъясӧн. Воана удждысьӧм облигацияяс позьӧ мӧдӧдны конверт пиын. Сӧмын колӧ индыны конверт вылас донсӧ облигацияясыслысь.
Налогсӧ пошта пыр налог мынтысьлы позьӧ мӧдӧдны волисполкомӧ, кытӧні сійӧ налог мынтысь оланінса сиктыслысь босьтӧны, либӧ веськыда финанс кассаӧ, кытчӧ шуӧма мынтыны налогсӧ сійӧ вӧлӧсьтыслысь.
Пошта вылӧ налог мынтӧм кузя сьӧмсӧ сетігӧн колӧ гижны сьӧм ыстан бланок, кытчӧ колӧ пасйыны волисполком нимсӧ либӧ финанс касса нимсӧ, кытчӧ сьӧмыд ыстыссьӧ, ним, вич да ов сьӧмсӧ ыстысьыслысь, кӧні сылӧн кӧзяйствоыс (кутшӧм губерня улын, уезд улын, вӧлӧсьт улын сиктыс) дай ещӧ, тӧдан кӧ, пасйыны, кутшӧм номерӧн индӧма кӧзяйствосӧ поселеннӧй списокын.
Ыстӧ кӧ сьӧмсӧ налог мынтысь бланокӧн пыдди конвертын, тані гижӧмторъяссӧ колӧ пасъявны торъя бумага вылын, заявленньӧ вылын. Тайӧ заявленньӧ вылас колӧ индыны тшӧтш — мыйта налогыс ыстыссьӧ сьӧмӧн, мыйта воана удждысьӧм облигацияясӧн.
Поштӧвӧй отделенньӧ мӧдӧдӧм вылӧ сьӧм босьтӧм йылысь сетӧ квитанция. Колӧ татшӧм квитанция вылас пошта отделенньӧыслы сетігас пасйыны «налогӧвӧй».
Тайӧ квитанцияыс и лоӧ удостоверенньӧӧн налог мынтӧм йылысь: мыйта мынтӧма да кутшӧм срокӧн. Волисполкомӧ воӧм сьӧмыс кӧть и сёрмыштас срок сертиыс, пеня срок кежлӧ мынтытӧмысь налог мынтысьлысь оз босьтсьы, мед сӧмын сійӧ налогсӧ пошта вылӧ сетіс-а.
Пошта вылӧ налог сетігӧн окладнӧй лист позьӧ и не мыччӧдлыны.
Сідзкӧ таво сельхозналог крестьяналы позьӧ мынтыны волисполкомъясӧ либӧ финанс кассаӧ ветлытӧг. Быд крестьянинлы позяс налогсӧ мынтыны, кытчӧ сылы окота.
Й. Р.
