КОЛӦ СУДЗӦДНЫ КӦЙДЫС

Тӧлысь мысти крестьяна кутасны кӧдзавны сю. Тайӧ кад кежлӧ быд сиктын, быд крестьянинлӧн колӧ лоны тырмымӧн сю кӧйдыс, медым эськӧ оз коль кӧдзтӧм весиг ӧти мутор. Дерт, ӧні быд крестьянинлӧн аслас кӧйдысыс абу тырмымӧн.

Тӧлысьыд — абу ыджыд срок. Колӧ мӧвпыштны ӧні жӧ, босьтчыны ӧнісянь жӧ быд крестьянинлы кӧйдыс лӧсьӧдан уджӧ.

Кутшӧм кӧйдысӧн бурджык кӧдзны муяс? Видзӧдлам кӧ колян вося сю кӧдзаяс, аддзам — унджык бокысь вайӧм кӧйдысӧн кӧдзӧм муяс вылас петасыс тшыки, эз быдмы. Сэтшӧм муяс вылас лои кӧдзны таво тулыс выль пӧв ид, пуктыны картупель, сідз водзӧ. Бокысь вайӧм кӧйдысъяс эз чужны, ӧти-кӧ — омӧль вӧснаыс, мӧд-кӧ — миян муяс вылӧ оз лӧсяв да.

Сідзкӧ бурджык муяс кӧдзны ас сю кӧйдысӧн. Сӧмын ас кӧйдысыс медым вӧлі бурджык. Сы вӧсна кӧйдыстӧ колӧ бурджыка весавны (сортируйтны). Оз кӧ сюр тырмымӧн ас сю кӧйдыс, сэки нин вӧлисти ковмас кӧдзны муяс бокысь вайӧм кӧйдысӧн. Сӧмын кӧдзтӧдз войдӧр колӧ бура тӧдмавны, абу-ӧ кӧйдысыс шыбитана омӧль, чужӧ-ӧ сійӧ.

Кыдзи лӧсьӧдны крестьяналы кӧйдыс? Медым эськӧ гӧль крестьянинлы оз ковмы шыасьны кулак бердӧ, кӧйдыс судзӧдан уджӧ колӧ медвойдӧр босьтчыны сельскокӧзяйственнӧй кооперативъяслы. Тайӧ кооперативъясыслы колӧ ӧнісянь жӧ, талунсянь жӧ босьтчыны кӧйдыс судзӧдӧм вылӧ. Колӧ сылы тӧдмавны, кытысьджык позьӧ судзӧдны ас кӧйдыс да босьтны сэтысь, колӧ сылы жӧ вайны бокысь вайӧм кӧйдыс.

Мӧда-мӧдлы отсасян комитетъяслы судзсьытӧмджык крестьяналы, медъёна нин гӧрдармеечьяс семьяяслы, колӧ сетны кӧйдыс водзӧсӧн.

Сэсся водзӧ кежлӧ вылӧ крестьяналы колӧ мӧвпыштны кӧйдыс фонд ас сиктаныс лӧсьӧдӧм йылысь. Тайӧ фондас мыйкӧ мында став крестьянаыс сетӧны кӧйдыссӧ да, кор кодлы ковмас, сэки и босьтасны. Тайӧ кӧйдыс фонд сиктъясын лӧсьӧдӧм кузя Видз-му Комиссариат вӧчӧ да ысталас инструкцияяс. Волисполкомъяслы колӧ кӧйдыс фонд лӧсьӧдӧм йылысь крестьянаӧн сёрнитны скодъяс вылын.