ФЛЕГОНТ ДЯДЬ ЙӦЗӦС ЫШӦДӦ ӦТУВЪЯ УДЖӦ

Тяпор сиктын (Поёл вӧлӧсьтын Сыктыв у.) ӧти крестьянин Флегонт Ермолай Ушаков ёна кутчысьӧ артельнӧй удж дінӧ дай йӧзсӧ ёна ышӧдӧ. Видзӧдан да, пыр сиктсьыд йӧзтӧ ыстӧ удж вылӧ. Оз кӧ йӧзыд чукӧрмы, кыкысь-куимысь сикттӧ кытшовтас.

Сійӧ зільӧмӧн ыджыд ужъяс нин вӧчӧма. Важӧн Сыктыв ю дорӧ подӧн эз позь мунны: 2 верст да джын нюр. Ӧні пос вӧчӧма, ветлӧны вӧлӧн. Сиктса йӧзыд шуӧны: Флегонт дядьыд кӧ пӧ эз вӧв, татшӧм поскыд миян эз и артмыв. Бӧртӧм сикт кузя ыджыд туй вӧлі мунӧ. Ветлыны вӧлі зэв няйт да чоя. Флегонт ёртлы оз кажитчы няйтӧд да чояинӧд ветлыны. Туйтӧ писькӧдіс йӧзкӧд веськыда Баба ягӧд. Ӧні ыджыд туйыс нин сэті мунӧ. Неважӧн на Флегонт ёрт аддзӧма видз места Бӧртӧм шорысь — зэв гырысь вӧраин. Чукӧртас сійӧ сиктса йӧзтӧ да артельӧн кутчысясны весавны. Ӧні артельнӧй весассьыд босьтӧны турун 25 додь.

Муяс вӧліны уна йӧрын. Быдлаын вӧлі потшӧс. Флегонт дядь бара аддзис туй. Сійӧ индӧм кузя муястӧ вӧчисны ӧти йӧрӧ. Потшӧсыд ӧні зэв этша локтӧ олысь вылӧ. Йӧзтӧ бара кокньӧдіс йӧртӧ потшны дай потшкыд этша колӧ.

Ӧні Флегонт дядьлӧн эм мыр бертан да канава кодъян снарад. Дорӧдӧма Кажым заводын аслас тшӧт вылӧ. Сиктса йӧзтӧ нуӧдӧ нюр косьтыны. Сӧмын йӧзыд оз на кутчысьны нюртӧ косьтыны.

Тяпор сиктса йӧзлы регыдджык колӧ ӧтувтчыны артельӧ да кутчысьны тайӧ удж дінӧ. Флегонт дядь кӧсйӧ вӧчны зэв ыджыд буртор.

Поёлса С. Чарин.