СӦВЕТЪЯС ЁНМӦДӦМ УДЖ

Юль тӧлысьын 10-ӧд лунӧ Обласьтувса Исполнительнӧй Комитетлӧн Президиумыс кывзӧма висьталӧм Зеленеч вӧлӧсьтын удж нуӧдӧм йылысь. Висьтавлӧма волисполкомын юралысьыс Игнатов ёрт.

Тшӧтш кывзӧмаӧсь Рабоче-Крестьянскӧй Инспекциялысь шуӧм Зеленечса волисполком уджалӧм йылысь. Инспекцияыс ыстылӧма мортӧс тӧдмасьны уджыскӧд.

Президиум шуӧма висьталӧмъяс серти, удж пӧ ӧні бурмӧма, сӧмын пӧ колӧ унатор на вӧчны. Медся войдӧр пӧ колӧ выль положенньӧ серти уджавны заводитны.

Сэсся пӧ колӧ ёнджыка тӧждысьны став крестьянасӧ Сӧвет удж дінӧ матыстӧм йылысь. Сы вӧсна колӧ: 1) кӧть ӧтчыд быд куим тӧлысь пиын висьтавлыны Сӧвет удж йылысь скодъяс вылын. 2) Тшӧктыны тшӧтш висьтавлыны ас удж йывсьыс кооператив да удждысян тӧвариществоӧс. 3) Быд куим тӧлысьын ӧтчыд волисполком заседанньӧ вылын кывзыны докладъяс удж нуӧдӧм йылысь быд вӧлӧсьтувса учрежденньӧлысь. 4) Лӧсьӧдчыны водзвыв выль Сӧвет бӧрйигкежлӧ, мед эськӧ бӧрйисны Сӧветсӧ став крестьянаыс, кодъяс закон серти вермӧны бӧрйыныс. 5) Кыпӧдны, бурмӧдны уджсӧ вӧлӧсьтувса Сӧвет секцияяслысь.

Волисполкомлы колӧ уджсӧ сідз пуктыны, мед эськӧ сійӧ ас вӧлӧсьтын нырщикаліс став овмӧс лӧсьӧдан да йӧзӧс велӧдан уджнас.

Волисполкомлы колӧ отсавны ёнмӧдны уджсӧ вӧлӧсьтувса мӧда-мӧдлы отсасян комитетлы, мед эськӧ сійӧ вермис став гӧль крестьяналы овмӧснысӧ кыпӧдан удж кокньӧдны.