ВЕРМАСЬӦЙ КООПЕРАТИВСА ЭМБУР ЛОТАЙТӦМКӦД

Кооперация пыр ми вермам крестьянаӧс нуӧдны бур олӧмӧ, кооперация пыр вермам крестьяналысь овмӧссӧ кыскыны социализм лӧсьӧдан уджӧ, кооперация пыр воам социализмӧ. Та вӧсна Сӧвет государство дай партия ёна зільӧны паськӧдны, бурмӧдны кооперациялысь уджсӧ, унджык крестьянаӧс пыртны кооперативӧ. Сідзкӧ кооперативын колӧ зільны зэв бура сувтӧдны уджсӧ, сідзкӧ сэтӧні колӧны зэв веськыда уджалысь йӧз, кооперациялысь уджсӧ лэптӧм вӧсна зільысь йӧз.

Талунъя номерын ми печатайтам Межадорса потребобществоын приказчикнас тӧварсӧ лотайтӧм йылысь. Лотайтӧма 350 шайт дон.

Татшӧм лотайтӧмыс абу сӧмын Межадорын. Миян газетын уна потребобществоса уджалысь йӧзӧн сьӧмсӧ, тӧварсӧ кытчӧсюрӧ, асланыс зептаныс видзӧм йылысь гижлӧма нин вӧлі.

Дерт, татшӧмторъястӧ кольны сідзи, нинӧм вӧчтӧг оз позь. Государство быд ногӧн зільӧ бырӧдны кооперативысь сэні уджсӧ нуӧдысь йӧзнас гусясьӧмсӧ, тӧваръяс лотайтӧмсӧ. Тайӧторсӧ государство шуӧ государственнӧй мыжӧн, кооперативысь гусясьӧм сетсьӧ судӧдз.

Крестьяналы колӧ аслыныс ёна зільны вермасьны кооперативъясын гусясьӧмкӧд. Оз ков вунӧдны — кооперативӧ пырӧм крестьянин ачыс ыджыд кооператив вылын, кӧзяин кооператив вылын. Сідзкӧ сылы колӧ аслыс видзӧдны кооператив эмбур вылӧ, видзны сійӧс кытчӧсюрӧ лотайтӧмысь.

Быд кооперативса шленлы асланыс кооперативӧ колӧ бӧрйыны веськыд, честнӧй йӧзӧс. Колӧ тшӧктыны кооперативас бӧрйӧм йӧзыслы тшӧкыдджыка видлавлыны тӧварсӧ, тырмымӧн-ӧ сэні тӧварыс, оз-ӧ приказчикыс лотайт. Колӧ кооперативса правленньӧлы, ревизионнӧй комиссияыслы тшӧктыны тшӧкыдджыка вӧчавлыны шленъяс водзын докладъяс асланыс удж йылысь, лавкаса тӧваръяс йылысь.

Лоӧ кӧ кооперативын гусясьӧм, лотайтӧм сэні уджалысьӧн, пырысьтӧм-пыр колӧ вӧтлыны сэтшӧм уджалысьтӧ, колӧ кыскыны судӧ, оз ков сетны некутшӧм прӧща.

Сӧмын кооперативса шленъясӧн асланыс видзӧдӧмӧн кооператив удж вылӧ, тшӧкыдджыка уджнас тӧдмасьӧмӧн позьӧ бырӧдны кооперативса эмбур лотайтӧм, гусявлӧм.