ПӦЖАРЪЯСЫСЬ ВИДЗЧЫСЯН УДЖ ВӦЧӦМ ВЫЛӦ ОТСӦГ

Миян Сӧвет государствоын пӧжаръясысь стрӧйбаяс дай мукӧдторъяс страхуйтӧ Государствоса Страхӧвӧй Отдел.

Мыйта воӧ сьӧмыс стрӧйбаяс пӧжаръясысь страхуйтӧмысь, сійӧ ставыс оз мун Госстрахлӧн пӧжаръяс лоӧм бӧрти йӧзлы мынтӧм вылӧ. Сотчӧм овмӧса йӧзлы мынтысьӧм бӧрти кольӧм сьӧмсӧ Госстрах оз видз кытчӧсюрӧ, а сетӧ йӧзлы пӧжаръясысь видзчысян удж вӧчӧм вылӧ.

Таво вылӧ татшӧм сьӧмсӧ Госстрах сетіс ӧти миллион шайт гӧгӧр. Сиктса обществояслы да пӧжарнӧй дружинаяслы тайӧ сьӧмсьыс сетӧны мыйкӧ мында либӧ сӧвсем вылӧ (бӧр бергӧдтӧм вылӧ), либӧ удждылӧны прӧчент босьттӧг.

Ёнджыкасӧ пӧжаръясысь видзчысян удж вылӧ йӧзлы Госстрах сетӧ оз сьӧмӧн, а кӧлуйӧн: пӧжарнӧй машинаясӧн, рукавъясӧн, биысь повтӧм (ӧзйытӧмджык) стрӧйбаяс вӧчан кӧлуйӧн. Пӧжаръяс кусӧдан кӧлуйсӧ Госстрах лӧсьӧдӧ центрын ачыс дай сетӧ йӧзлы мукӧд дорысь донтӧгджык.

Сӧвсем вылӧ сьӧмыс сетсьӧ судзсьытӧма олысь йӧзлы. Удждысяна сьӧмсӧ сетӧны уна срок кежлӧ, 100 шайт удждыссьӧ во джынсянь воӧдз кежлӧ, 100 шайтсянь 300 шайтӧдз — ӧти восянь куим воӧдз кежлӧ, 300 шайтысь унджык — куим восянь вит воӧдз кежлӧ.

Удждӧ дай сӧвсем вылӧ сьӧмсӧ Госстрах сетӧ со кутшӧмторъяс вылӧ: пӧжарнӧй дружинаяслы дай йӧзлы кусӧдчан кӧлуй лӧсьӧдӧм вылӧ, кусӧдчан кӧлуйсӧ дай пӧжарнӧй сарайяс дзоньмӧдӧм вылӧ, пӧжарнӧй дружинаяслы пӧжаръяс кусӧдны ветлывлӧмысь премияяс вылӧ дай мукӧд пӧжарысь видзчысян уджъяс вылӧ.

Татшӧм отсӧгыс кӧ колӧ кутшӧмкӧ сиктлы либӧ пӧжарнӧй дружиналы, колӧ сы йылысь налы шыӧдчыны Страхӧвӧй контораясӧ.