КУТАМ ОГӦ МИ ЛЭБАВНЫ?
Коми йӧз миян садьмӧма, мунӧ выль олӧмлань. Гызьӧмаӧсь сиктъяс, грездъяс. Пессьӧны-тільсьӧны коми йӧз овмӧс бурмӧдӧм вӧсна. Заводитӧны выль ног уджавны. Ӧтувтчӧны — кокньӧдӧны удж. Мый вермӧмсьыс кыссьӧны югыдлань. Уна коми челядь велӧдчӧны гырысь карын. Велӧдчӧны ас карын, велӧдчӧны сиктъясын. Оз тырмыны школаяс, оз тырмы сьӧм школа вылӧ. Школа кындзи велӧдчӧны коми йӧз удж вылын ӧтувтчӧмъясын, велӧдчӧны лӧсьӧдны олӧмнысӧ бур ногӧн, выль ногӧн. Корсьӧны коми йӧз бур, гажа шойччӧг. Кыссьӧны спектак вылӧ, кывзӧны сьылӧм-ворсӧм. Ыджыда воськовтісны тайӧ воясӧ коми йӧз водзӧ. Эм налӧн вын, тырмас кӧсйӧмыс, оз сувтны шӧрӧ-выйӧ, мунасны водзӧ. Сӧмын быд водзмӧстчӧм, быд удж крукасьлӧ ӧти мытшӧ — ылын.
Ылын войвылын пемыд пармаын паськыда разӧдчӧмаӧсь коми йӧз. Сё верстъясӧн лыддьысьлӧ костыс сиктъяслӧн. Сьӧкыд кутны йитӧд мукӧд каркӧд, сьӧкыд сійӧс кутны ас каркӧд, ас грездъяс кост. Оз тӧдны коми йӧз, мый вӧчӧны, кыдзи олӧны ёртъясыс ас муас, оз тӧдны, мый вӧчсьӧ паськыд му вылас. Тӧлысьӧн-тӧлысьӧн аръясын, тулысын пукалӧны коми йӧз гуын моз ас сиктъясас — весиг морт оз волы бокиысь, весиг ӧти юӧр оз волы регыдӧн некытысь.
Сы понда кольччӧны олӧмсьыс. Ыджыд паськыд каръясын олӧмыс пуӧ, быд лун вайӧ выльтор, выль юӧр, йӧзыс ӧдйӧ восьлалӧны водзӧ.
Коми йӧз пыр кольччӧны, бӧрын олӧны — забеднӧ.
— Эськӧ вӧліны кӧ бордъяс! — А мукӧдлаын йӧзыс важӧн нин вӧчӧмаӧсь кӧрт бордъяс. Важӧн нин лэбалӧны карысь карӧ, новлӧны юӧръяс, кыпӧдӧны вылӧ, югыдлань йӧзӧс.
Кӧрт туйяс кындзи, бур ва туй кындзи, бур вӧла туйяс кындзи, мукӧдлаын лэбалӧны аэропланъяс, мед ещӧ ӧдйӧджык ветлісны выль юӧръяс.
Коми муын кӧрт туйыд абу. Юяс унджык пӧрасӧ во пиас йи улынӧсь. Вӧла туйяс гожӧмын некытчӧ оз шогмыны. Арын да тулысын дзикӧдз сувтлӧ став ветлӧмыс.
Эз ӧмӧй эськӧ миянлы ков сэтшӧм бордъя машинаыд? Эз ӧмӧй лӧсьыд вӧв, талун кӧ думыштін да, аски вӧлін Мӧскуаын либӧ кӧнкӧ Изьваын? Эз ӧмӧй бур вӧв, письмӧтӧ кӧ мӧдӧдін да, тӧлысь пыдди сійӧ ӧти лунӧн местаас воис? Эз ӧмӧй лӧсьыд вӧв, став мог вылад кӧ — кутшӧмкӧ корӧм вылӧ ли норасьӧм вылӧ — вочакывйыс воис вежонӧн куим тӧлысь пыдди? Сэки эськӧ олӧмыд коми йӧзлӧн мӧдіс водзӧ тэрыбджыка, збойджыка. Сэки эськӧ коми йӧз вермисны ӧдйӧнджык велӧдчыны мӧда-мӧдыслысь дай мукӧд йӧзлысь уджавны, выль олӧмсӧ лӧсьӧдны.
Сэки эськӧ найӧ кутісны кольччытӧг, ӧти воськолӧн мунны став уджалысь йӧзыскӧд выль олӧмлань.
Коми йӧз велалӧмаӧсь вермасьны быдсяма сьӧкыд, ён выныскӧд.
Гӧгӧрвоасны кӧ став коми йӧзыс, мый бур вермас вайны ӧти-кык лэбалан машина, найӧ нинӧмысь оз повзьыны, став вынсӧ чукӧртасны да шуасны:
— Кутамӧй лэбавны!
А. В.
