ӦТУВТЧИМ МУ УДЖАВНЫ

Давпомын (Выльгорт вӧлӧсьтын Сысола уездын) май тӧлысьын воссьыліс видз-му уджалан кружок.

Ёна отсаліс восьтынысӧ Сыктывдін совпартшколаын велӧдчысь Муравьёв ёрт.

Кружокӧ пырисны 22 морт, гӧлиник крестьяна да ӧткымын шӧркоддьӧма олысь.

Лун кык мысти шӧркоддьӧма олысь крестьянаыд бӧр петісны кружоксьыд, дай колины сӧмын 15 морт.

Уджавны заводитігӧн кружокын колӧ вӧлі сьӧм. Кӧсйим босьтны уджӧн Сельскокӧзяйственнӧй Банкысь — эз сетны.

Сэсся ми шыӧдчим обласьтувса видз-му уджалӧм вылӧ удждысян обществоӧ. Сійӧ сетіс миянлы уджӧн 50 шайт. Лои миян сьӧм. Ньӧбим колан кӧйдысъяс.

Му миянлы сетісны: обществосянь — 800 кв. сажень да крестьянаыс ӧти во кежлӧ ещӧ сетісны 800 кв. сажень.

Му вылӧ ми кӧдзим: ид, зӧр, анькытш, шабді, бобӧнянь, тимофеевка, вика да турнепс.

Сэсся кӧдзим уна пӧлӧс пуктас. 800 кв. саженьсӧ ми юким 8 пельӧ. Водзӧ кежлӧ сідзи-й кӧсъям уджавны кӧкъямыс пельӧ юкӧмӧн.

Гӧриг-кӧдзигӧн да пуктысигӧн отсалісны-велӧдісны миянӧс агрономъяс Темноев да Иванов, тшӧтш отсасис Муравьёв ёрт.

Кывлывлан шуасьӧм — мутӧ кӧ пӧ бура куйӧдалан, агрономтӧг няньыд бур воас.

Ми огӧ кывзӧ сэтшӧм сёрниястӧ. Унджык муыс миян вӧлі эжа-а, став муыс вӧлі важӧн нин куйӧдавтӧм.

Агрономъяс висьтавлӧм серти ми вайим кытчӧ колӧ вӧлі сьӧд му, сэсся куйӧд петкӧдім, пӧим да известка вайим.

Уджалам муяснымӧс асьным — став шленыс семьяяснымкӧд.

Кутшӧма мый миян воас арнас — гижам мӧдысь.

И. Налимов.