ВЕСАЛӦЙ ПУКТАСЪЯСТӦ ЁГЫСЬ

Му выв кӧдзаяслы да град выв пуктасъяслы бура быдмӧмсӧ медъёна падмӧдӧ ёг турун. Миян муяс ни, градъяс ни прамӧя некор ёгысь оз весавлыны. Ёгсӧ кӧ он весав прамӧя, бур му вылын, ёна куйӧдалӧмӧн град выв пуктасыд вермас локны сӧмын коймӧд юкӧныс, бура весалӧм градъяс дорысь.

Ёг турунъяс ӧдйӧджык быдмӧны дай омӧльджыка кулӧны пуктасъяс серти. Сэсся найӧ мусьыс босьтӧны зэв уна вын да ва, кодъяс ёна колӧны пуктасъяслы. Сэсся ёгыд ёна кутӧ шонді югыдсӧ. Сы вӧсна пуктасъяс быдмӧны омӧликӧсь, помӧдзыс оз и удитны воныс.

Видлавлісны град выв пуктас воӧм со кыдзи: босьтавлісны кык дзик ӧткодь му, уджалісны сійӧс дзик жӧ ӧткодя, ӧткодя кӧдзисны. Сӧмын ӧти мусӧ весавлісны, мӧд мусӧ эз. Урожайсӧ босьтігӧн первой му вывсьыс босьтісны куим мында. Сю воис весавтӧг 11 пуд, весалӧмӧн 33 пуд. Картупель весавтӧг 275 пуд, весалӧмӧн 830 пуд.

Сэсся ёг турун пӧвстын олӧны быдпӧлӧс пуктас сёйысь гагъяс да пуктасъяс висьӧдысь тшакъяс. Найӧ вермасны став пуктастӧ дзикӧдз жугӧдны.

Уна во олысь ёг турунъяс быдмӧны вужсяньыс. Сы вӧсна ёгтӧ весалігӧн колӧ найӧс перъявны вужъяснас. Бурджык лоӧ, арнас кӧ градъястӧ ставсӧ гӧрам вершӧк 4−5 либӧ ещӧ на джуджыдджыка.

Ӧти вося ёг турун быдмӧ кӧйдысысь. Сы вӧсна найӧс вотӧдзыс (кӧйдысавтӧдзыс) оз ков видзнысӧ, весавны водзджык. Видзан кӧ, вермас кӧйдысыс паськавны град йӧр пасьтаыд. Нетшкыны найӧс колӧ вужнас жӧ. Засӧ кӧ колян, вермасны засьыс бӧр быдмыны. Сӧмын некутшӧм ёг турун кӧ оз ло град вылын, ми вермам виччысьны пуктасъяслысь бура воӧм.

А. Иванов.