* * *

Кыдзи Ӧртьӧм
Облигация ньӧбис — видзис дас шайт сьӧм
Да воис деньга дзонь нӧб.
А сылӧн суседыс, Ларӧ,
Нарошнӧ ветліс карӧ,
Да эз ньӧб.

1.

Олісны суседъяс Ларӧ да Ӧртьӧм.
Ӧртьӧмлӧн вӧлі дас шайт сьӧм,
Дай мӧвпалӧ: мыйла пӧ дзебны
Деньгаӧс, лучшӧ пӧ ньӧбны
Крестьяна удждысьӧм дас шайт дон,
Сэки и прӧчент локтас ён.

2.

Ларӧлӧн сымда жӧ вӧлӧма деньга,
Сӧмын оз ышмы, няргӧ да бреньгӧ;
Лӧвтӧ: дерт пӧ удждысьӧм бур,
Да код тӧдӧ, — гыжъялӧ юр, — 
Вошӧ кӧ, тыртӧммас зеп...
Лучшӧ ме гуала... удждысьӧм ог ньӧб!..

3.

Ӧтчыд Ӧртьӧмӧс нужда суис — 
Закладӧ облигация нуис.
Кассаысь сетісны кӧкъямыс шайт.
Страдна вылӧ видзис шайт вит-ӧ-квайт,
Сэсся мукӧд гуранъяс дӧмис,
Да-й кӧлач вылӧ на тырмис сійӧ сьӧмыс.

4.

Ларӧ сэк дӧзмӧма, быттьӧкӧ ош...
«Ӧртьӧмлӧн деньгаыс эз ӧд и вош!..
Часлы жӧ ветла ме юасьны карӧ...»
Ветліс куим лун. Локтіс Ларӧ,
Вайӧма висьт:
Кӧсйи нин пӧ ньӧбны, да... эг лысьт...

5.

Ӧртьӧм нажӧвитыштны эштіс — 
Облигация закладысь бӧр нин вештіс.
Ӧтчыд газетысь аддзис Ӧртьӧм:
Латарейӧн усьӧма сылы сё шайт сьӧм.
Ӧні и овмӧс бурмыны мӧдас,
Скӧтыд содас, плугыд шедас.

6.

Ларӧлы быд вой усьлывлӧ вӧт:
«Овліс Ӧртьӧм тшыг нисьӧ пӧт,
Морыд сэсся озырмис бӧрын...»
— А ми пыр олам бӧрӧн, — 
Ларӧ пыркӧдӧ юр, — 
Аддзыны кутіс удждысьӧмысь бур.

7.

Помасис страдна, матысмӧ срок
Мынтыны видз-му налог.
Ӧртьӧмлӧн облигация иніс — 
Вося налогыс ӧтпырйӧн мыніс.
Пӧра мунӧ, воис нин ар.
Вӧлисти вӧрзьӧдчис ыдъясьысь Лар...

8.

Дзебӧминысь деньга перйис,
Да нӧшта «шудаджык» лун бӧрйис,
Сэсся и муніс Волисполкомӧ.
Муртса на воис кильчӧ пос помӧ,
Шуис Волисполком:
«Удждысьӧм вузалӧмлы воис нин пом».