МИЯН ОБЛАСЬТЫН САМОЛЁТЛӦН ЛЭБАН ТУЙЫС

ОДВФ-лӧн Обласьтувса Сӧвет лӧсьӧдіс комиссия Коми обласьтӧ локтан самолётлы паныд петӧм (встречайтӧм) лӧсьӧдӧм кузя. Юль 5-ӧд лунӧ тайӧ комиссияыслӧн вӧлі заседанньӧ. Сійӧ лӧсьӧдіс Коми обласьтӧ самолётлы пуксьыланінъяссӧ со кыдзи: самолёт локтас Чердінсянь. Воны колӧ юльын 18-ӧд лун гӧгӧрын. Локтігмозыс медвойдӧр миян обласьтын пуксьылас Кулӧмдінӧ. Сэтісянь лэбзяс Шойнатыӧ. Кыкнанладорас самолёт кыпӧдчылас да неылыті кытшовтас, лэбӧдлас мыйкӧ мында йӧзӧс.

Сэсся сы бӧрти самолёт локтас Сыктывдінкарӧ. Татысянь лэбзьылас Сыктыв уездӧ Пустӧшӧдз, Ыбӧдз да Емдін уездӧ Пальӧдз. Сыктывдінкарын йӧзӧн кыпӧдчылас 14-ысь. Котласӧ лэбзигмоз самолёт вӧчас кыкысь лэбзьӧм Емдінӧ.

Комиссия индіс ёртъясӧс, кодъяслы тшӧктӧма лӧсьӧдавны самолёт пуксьыланінъяссӧ — площадкаяс: Кулӧмдінын да Шойнатыын — Бачуринскӧй ёртӧс, Пустӧшын да Ыбын — Кипровскӧй ёртӧс, Пальын — Кипровскӧй ёртӧс либӧ Куклин ёртӧс, Сыктывдінкарын — Коскоков ёртӧс, Емдінын — Авиахим уездувса Сӧветӧс. Самолётсӧ колльӧдны Кулӧмдінсянь Сыктывдінкарӧдз кутас Бачуринскӧй ёрт, Сыктыв да Емдін уездъясӧ — Кипровскӧй ёрт.

Локтысь самолётыс‐гидроплан пуксьывны кутас юяс вылӧ либӧ гырысь тыяс вылӧ.

Булышев ёртлы тшӧктӧма лӧсьӧдны списокъяс — кӧні кымын мортӧс лэбӧдлас самолётыс. Сійӧ кыпӧдлас вель уна крестьянаӧс, кодъяс окотитасны пуксьывны самолётас. Булышев ёртлы жӧ тшӧктӧма лӧсьӧдны литература.