КЫДЗИ ЛӦСЬӦДАВНЫ ПӦЖАРНӦЙ ДРУЖИНАЯС

Пӧжаръясысь видзчысян уджын медвойдӧр колӧ лӧсьӧдны пӧжарнӧй дружинаяс. Пӧжарнӧй дружинатӧг бура кусӧдчӧм некӧні оз вермыв лоны. Дружина лӧсьӧдны абу сьӧкыд. Эмӧсь кӧ окотитысь йӧз сійӧ удж вылас, войдӧр позьӧ ӧтувтны сӧмын морт 8−10 кымын. Найӧ сёрнитасны удж йывсьыс, мый вермасны лӧсьӧдыштасны. Сы бӧрын позьӧ сэсся чукӧртны мукӧд шленъясӧс. Чукӧрмас кӧ морт кызь кымын, позьӧ лӧсьӧдны прамӧй дружина: став гижсьысьыс шленсӧ колӧ чукӧртны собранньӧ вылӧ, сэтӧні вӧчны устав, бӧрйыны юралысьӧс да сылы отсасьысьясӧс, сэсся став уджсӧ юкны шленъяс костас.

Уставсӧ позьӧ судзӧдны волисполком пыр либӧ страхӧвӧй агентство пыр. Юралысьӧ колӧ бӧрйыны бура уджалысьӧс. Шленскӧй взносъяс колӧ лӧсьӧдны посньыдикӧс, мед пырны вермасны быдӧн. Отсӧг вылӧ сьӧмсӧ дружиналы позьӧ корны вӧлӧсьтувса бюджетысь либӧ Госстрахысь. Сы кындзи сьӧмсӧ позьӧ чукӧртны спектакъяс пуктӧмӧн, крестьяналысь ӧктысьӧмӧн да сідз водзӧ.

Дружина пытшкас уджсӧ позьӧ лӧсьӧдны Центрса пӧжарнӧй юкӧд инструкция серти. Сійӧ инструкциясӧ позьӧ судзӧдны вӧлӧсьтувса исполкомъяс пыр либӧ страхӧвӧй агентство пыр.

Медвойдӧр дружиналы колӧ лӧсьӧдны важ пӧжарнӧй кӧлуйяс: пӧжарнӧй машинаяс, рукавъяс, бӧчкаяс да мукӧд пӧлӧс посни кӧлуй. Сэсся колӧ лӧсьӧдны бура пӧжарнӧй сарай. Видз-му юкӧдъяс дружинаяслы вермасны отсавны вӧр кӧлуйӧн.

Сійӧ уджыскӧд ӧтпырйӧ колӧ велӧдны шленъясӧс кусӧдчан уджӧ. Быд шленлы колӧ индавны аслыс удж кусӧдчигӧн.

Дружинаяслы колӧ тӧждысьны быдпӧлӧс пӧжаръяскӧд вермасян удж вӧсна: мед юкмӧсъяс вӧліны бурӧсь, пачьяс, трубаяс абу вӧлі жугавлӧмаӧсь, мед выль стрӧйбаяс лӧсьыда лэпталісны, пуяс садитісны керка гӧгӧрӧ да сідз водзӧ. Колӧ вӧчны сідзи, медым дружина некор эз вунӧдлы ассьыс уджсӧ, медым пыр вӧлі лӧсьӧдчӧма пӧжарӧс кусӧдны.

В. Миндовскӧй.