ИГНАТОВ ПУЗЬӦМА
Помӧсдінса Госторг лавкаын служитысь Игнатов пузьӧма. Мортыд газетӧ веськалӧма^Видзӧд «Коми Сикт» газетысь 5-ӧд № «Игнатов — кулак»./^. Мукӧд кӧ газетад веськалӧны — зэв нимкодясьӧны. Шуасны: «Со ӧд кутшӧм ме морт! Газетӧ веськалі!» Мукӧд кӧ газетад веськалӧны — дугдӧны омӧлясӧ уджавны, кутшӧмтор йылысь газетас гижласны. Игнатовыд миян некоднансӧ эз вӧч. Сійӧ ёна пузис, скӧрмис. Юръяс вылӧ лэптіс. Морӧсас аслыс кучкалӧ.
— Ме ӧд Сергей!.. Сергей!.. Сергей некодысь оз пов!.. Обласьтувса инспекцияысь кындзи!.. Кысь на тэныд, зырымбедьлы, Сергейкӧд водзсасьны! — шуӧ Сергей газетӧ гижысьлы — Пионер зілы.
Газетӧ гижысь — Пионер зі вылӧ Сергей ёна лёксӧ песӧ: быд пежнас, быд омӧльнас видӧма, быд ногыс повзьӧдлӧма. Кыдзи нӧ лёктӧ он пес. Сергей Помӧсдінын асьсӧ сарын лыддьӧ, обласьт пасьта мӧд сарӧ пуксьӧ. Медыджыд сарыс Сергейлӧн обласьтувса инспекция. Кыдзи нӧ лысьтіс кутшӧмкӧ Пионер зі обласьт пасьта мӧд сарӧс газетӧ гижны? Кыдзи лысьтіс газетас Савиныс лэдзны?
Игнатов лавкасӧ вежон пиын сӧмын пӧв-мӧд восьтылӧ. Мукӧд лунсӧ другъясыскӧд пируйтӧ. Крестьяналы, верстьӧ йӧзлы лоӧ виччысьны лавка воссьӧм, да найӧ нинӧм оз шуны.
Кутшӧмкӧ зырымбедь, Пионер зі, лысьтӧ Сергей дінӧ пондыны, сы йылысь газетӧ гижны.
Коммунист партия да Сӧвет власьт ёна видзӧдӧны газетӧ гижысьяс вылӧ, тшӧтш пионеръяс вылӧ, ышӧдӧны найӧс удж вылӧ, сулалӧны на дор. Сідзкӧ Коммунист партияыс дай Сӧвет власьтыс — зырымбедьяс жӧ. Сідз али абу, Игнатов, обласьт пасьта мӧд сар?
Лудӧ, лудӧ Сергейлӧн киыс Пионер зі вылӧ. Повзьӧдлӧ морттӧ.
Миян ещӧ кутшӧма лудӧ синным Игнатов вылӧ. Сідзи и син вештывтӧг видзӧдам сы вылӧ. Сӧмын мед вӧрзьӧдыштас ӧти чуньнас газетӧ гижысь Пионер зіӧс, сӧмын мед заводитлас увтыртны сійӧс, пырысьтӧм-пыр ми аддзам места, пырысьтӧм-пыр Игнатовлӧн киыс дугдас лудны.
Ми ӧд огӧ пыдди пуктӧй саръястӧ. Ӧні ӧд абу модаыд саръяс вылад. Миян ног жӧ шуӧ Игнатов йылысь ӧні юӧртысь Яг зон ёрт.
Ми корам Коми Госторгӧс, збыль кӧ гӧгӧрбок Пионер зіӧн газетӧ гижӧм, гирулетки Игнатовӧс вӧтлыны лавкаысь. Прокуратураӧс корам, медым Игнатов эз кут повзьӧдлыны Пионер зіӧс. Пионер зіӧс корам важ моз збой сьӧлӧмӧн уджавны газетын.
