БЫДӦНЛЫ МОГ ПӦЖАРЪЯСКӦД ВОДЗСАСЬНЫ

Миян сиктъясын став удж пӧвстсьыс медомӧля на сувтӧдӧма пӧжаръяскӧд водзсасян удж.

Нэмсяньыс нин крестьянаӧс жугӧдӧны пӧжаръяс. Мый вӧсна лоӧны пӧжаръяс, быдӧн тӧдӧны: керкаяс лэптӧны тшӧкыда, биясӧн вӧдитчӧны видзчысьтӧг, пачьяс, трубаяс пыр киссьӧмаӧсь, пӧжарнӧй машинаяс, бӧчкаяс омӧльӧсь, лӧсьӧдтӧм. Сэтшӧм сиктъясад шоч воас оз овлыны пӧжаръясыд.

Мукӧддырйиыс пӧжар бӧрад сиктыд садьмылас: заводитасны лӧсьӧдавны пӧжарнӧй машинаяс, пӧжаркӧд водзсасян кӧлуй, овны кутасны видзчысьӧмӧн. Сӧмын ӧти здук мысти ставыс вунӧ, бара эновтчасны пӧжарысь видзчысьӧмысь выль пӧжарӧдз. Унаысь на ӧні овлывлӧ — крестьяна кусӧдчӧм пыдди пӧжар вылӧ петкӧдӧны «неопалимӧй купина» ӧбраз, виччысьӧны сылысь пӧжар кусӧдӧм.

Пӧжаръяскӧд водзсасян уджӧ колӧ кутчысьны став организацияяслы, став крестьяналы. Сійӧ уджыс абу кутшӧмкӧ юкӧдлӧн (учрежденньӧлӧн) ӧтнаслӧн.

Медвойдӧр вӧчан, медыджыд уджыс сиктса организацияяслӧн (коммунист да РЛКСМ ячейкаяслӧн, мӧда-мӧдлы отсасян комитетъяслӧн, волисполкомъяслӧн, мукӧдлӧн) — ӧтувтны крестьянаӧс пӧжаръяскӧд водзсасян уджӧ. Сійӧс позьӧ вӧчны уна ног. Колӧ лӧсьӧдавны пӧжарнӧй дружинаяс, лӧсьӧдны торъя йӧзӧс видлавны пыр пачьяс, трубаяс, видзчысьӧмӧн вӧдитчыны биӧн, бырӧдны самӧкур пуысьясӧс, лӧсьӧдны бура пӧжаркӧд водзсасян кӧлуй, керкаяс лэптігӧн колявны гырысьджык костъяс, садитны керка гӧгӧрыд пуяс.

Пӧжаркӧд водзсасян удж кузя сиктъясын зэв на уна уджыс. Сиктын пӧжаръяскӧд водзсасьӧм удж — выль озыр сикт вӧсна водзсасьӧм. Оз вермы лоны прамӧй удж, оз вермы лоны сиктлӧн озырлун, кӧні быд здук вермас ставыс сотчыны.

В. Глен.