ВӦР ЙЫЛЫСЬ

(Кыдзи уджыс мунӧ Емдін уездын)

Кер лэдзан удж Емдін уездын паськалӧ. Кольӧм 23/24 воын Северолес вӧлі лэдзӧма 153 сюрс кер да 34 сюрс шпал — 245,702 шайт дон. Тайӧ 24/25 воӧ Северолес лэдзӧма 158,430 кер да 77,629 шпал — 252,411 шайт дон.

Вӧр весалан удж муніс тулыснас. Крестьяна весалісны вӧр кер лэдзӧм вылӧ: сьӧм вылӧ уджӧдӧм эз вӧв.

Гожӧмланьыс лои дугӧдны тайӧ уджысь биысь полӧм вӧсна.

Йӧз костын нуӧдӧма удж, висьтавлӧма налы вӧръяс биысь видзӧм йылысь. Сэсся вӧраинъяссӧ юклӧма, индалӧма, кытісянь колӧ босьтчыны пӧжар дырйи. Быд лесничествоын эм 2 пӧжарнӧй старӧста. Крестьяна переменаӧн дежуритӧны, биысь видзӧны вӧрсӧ.

Кӧкъямыс вӧлӧсьтын вӧлі конференция, сёрнитісны вӧрын нуӧдӧм уджъяс йылысь. Сэсся уналаын вӧлі «Вӧр лун». Ӧтиктор омӧль вӧлі: крестьяналы сёрӧн вӧлі сетӧма вӧрсӧ да, эз удитавны лэдзны ставсӧ. Лои корны налы сроксӧ кер лэдзӧм помалӧм вылӧ нюжӧдны.