ДЕРЕВНЯ — ГОСУДАРСТВОЛЫ,

ГОСУДАРСТВО — ДЕРЕВНЯЛЫ

Воысь воӧ Сӧвет власьт кокньӧдӧ олӧмсӧ крестьяналысь.

Таво крестьяна кутасны налог мынтыны 240 миллион шайт. Воддза во дорысь 100 миллионӧн этшаджык.

Сэсся налогыс мӧд ногӧнджык ӧні босьтсьӧ: урчитӧма срокъяс, восьтӧма комиссияяс вӧлӧсьтъясын, выль ног босьтӧны лыдӧ скӧт — ставыс тайӧ кокньӧдӧ налог мынтӧмтӧ.

Воысь воӧ содӧ деревняын колян сьӧм.

1922−23 воын доходыс крестьяналӧн миян государствоын вӧлі 3858 миллион шайт. Сэтысь налог вӧлі 406 миллион — 10½%.

1924−25 воын доход вӧлі 7227 миллион шайт. Налогыс сӧмын 335 миллион — 4,6%.

Таво налог куим прӧчентысь вылӧ оз кай. Сідзкӧ 97 прӧчент доходсьыс кольӧ таво крестьяналы аслыныс.

Сэсся государство деревнялы ӧні сетӧ пыр унджык.

Сідз, 1923−24 воӧ государство сетіс крестьяналы нянь вотӧминъясӧ машина вӧчӧм вылӧ уджӧн 60 миллион шайт, а 24−25 воын сетіс нин 140 миллион шайт. Татчӧ жӧ колӧ ещӧ содтыны государствоӧн сетӧм сьӧм йӧзӧс велӧдӧм вылӧ, туйяс вылӧ, больничаясӧ да мукӧдтор вылӧ — 48 миллион шайт.

Крестьяналы жӧ колантор вылӧ мунӧ вӧлӧсьтъяслӧн бюджетыс 300 миллион шайт.

Уна на мукӧд рӧскод эм государстволӧн деревня вылӧ.

Ставыс тайӧ петкӧдлӧ миянлы: крестьяна воысь воӧ асланыс доходсьыс государстволы сетӧны этшаджык.

Йӧзӧс югдӧдӧм вылӧ, крестьяна овмӧс кыпӧдӧм вылӧ пыр ӧтарӧ унджык сьӧмсӧ государство сетӧ.

Ёна тӧждысьӧ Сӧвет власьт крестьяна овмӧс кыпӧдӧм вӧсна. Сы понда бюджетсӧ ассьыс лӧсьӧдӧ сідзи, медым эськӧ унджык позис сетны крестьяналы, медым эськӧ ещӧ на ёнмис ӧтувтчӧм крестьяна-рабочӧй кост.