МИЯН СӦВЕТ СОЮЗЛАНЬ
(Сӧвет Союзса конституция лӧсьӧдӧмлы кык во тырӧм кузя)
Миян Сӧветскӧй Союз дінӧ кутчысьӧны став мувывса рабочӧйыс.
Сідз жӧ Союз вылӧ видзӧдӧны, велӧдчӧны сылысь став мувывса крестьянаыс.
Быд государствоын на, миян кындзи, ӧнӧдз крестьянаӧс кутӧны чорыд кабырас помещикъяс. Ӧнӧдз на ёна дзескӧдӧны муысь, пӧдтӧны вотӧн. Ӧнӧдз на крестьяналысь юръяссӧ бергӧдлӧны асланыс «мелі» кывъяснас озыр йӧз. Уна басни висьтавлӧны озыр йӧз крестьяналы миян Сӧветскӧй Союз йылысь, коммунистъяс йылысь. Рабочӧйяс омӧля нин кывзӧны сійӧ басниястӧ, а крестьяна эскӧны на.
Сы понда мукӧддырйи крестьяна дай налӧн ӧтувтчӧмъясыс — крестьянскӧй партияяс (сэтшӧмъясыс эмӧсь мукӧд государствоясын) — мунӧны воча миян Союзлы.
Сӧмын кор крестьяна неуна кӧть кывласны веськыд кыв миян государство йылысь, миян крестьяна олӧм йылысь — думныс налӧн вежсьӧ, найӧ заводитӧны мӧд ногӧн, бура видзӧдны миян вылӧ.
Тадзи вӧлі Польшаын, коммунист Ланцуцкӧйӧс судитігӧн.
Польшаса суддяяс да мыждысьыс суд вылас ёна коялісны няйтӧн миянлысь Союз да коммунистъясӧс. Заседательясыс крестьяна вӧлі кывзӧны да быттьӧ на моз жӧ мӧвпалӧны. Сӧмын суддяясыд «неыджыд ӧшыбка» вӧчисны. Шобигас Ланцуцкӧй ордысь сюрӧма вӧлі Бухарин ёртлӧн ӧти нига. Сійӧ нигатӧ суд вылас кытсюрӧ лыддьӧмаӧсь. Кор крестьянаыд кывлӧмаӧсь Бухарин ёртлысь кывъяссӧ, кыдзи коммунистъяс мырддьӧмаӧсь помещикъяслысь му да сетӧмаӧсь крестьяналы — сэки мӧд ног пондӧмаӧсь видзӧдны коммунистъяс вылӧ. «Бура вӧчӧмаӧсь Рочмувывса большевикъяс», — шуӧмаӧсь найӧ.
А кор налы ковмис шуны — мыжа абу Ланцуцкӧй ёрт, найӧ шуисны: абу мыжа. Тадзи польшаса судлы лои мездыны Ланцуцкӧй ёртӧс.
Кутшӧм государствоын крестьяна ёнджыка тӧдӧны миян йылысь? Дерт, кодъяс миян дінын матынджык олӧны. Сы понда Польшаын, Румынияын крестьяна, кор кыпӧдчыласны, кӧсйӧны государствонысӧ миян моз жӧ лӧсьӧдны. Сы понда найӧ мукӧддырйи тшӧктӧны ӧтувтны ассьыныс мунысӧ миян Союзкӧд. Оз сӧмын маті государствоын — ылі муясын, асыввылын — Китайын, Индияын, мукӧдлаын Сӧветскӧй Союзын олӧмыс, уджыс водзмӧстӧ крестьянаӧс.
Ёнджыка кӧ пондасны став му вылас крестьяна тӧдны миян Союз йылысь, ёнджыка пондасны велӧдчыны миянлысь, ӧдйӧнджык мунасны миян туйӧд, вӧчасны революция.
