ПАРТИЯ ДА ГАЗЕТӦ ГИЖЫСЬЯС

Сиктъяссянь газетӧ гижысьяс (селькоръяс) сетӧны ыджыд отсӧг Коммунист партиялы да Сӧвет власьтлы став уджсӧ нуӧдӧмлы, удж вӧчӧмӧ сиктъясын видзӧдӧмлы, законъяс олӧмӧ нуӧдӧмлы. Газетӧ гижысьяс аслас уджӧн ёна отсалӧны матыстны крестьянаӧс партия бердӧ, Сӧвет власьт бердӧ. Партиялӧн да Сӧвет власьтлӧн ӧні ыджыд мог — унджык крестьянаӧс Сӧвет уджӧ, обществоса уджӧ кыскыны. Газетӧ гижысьяс сэтшӧм жӧ обществоса удж нуӧдысьяс сиктъясын. Кымын унджык газетӧ гижысь лоӧ, сымын унджык крестьяна обществоса удж нуӧдӧ.

Со мый вӧсна Коммунист партия да Сӧвет власьт ёна видзӧдлісны газетӧ гижысьяс вылӧ, найӧ удж вылӧ, найӧ уджлы быд ногӧн отсалӧм вылӧ да дорйӧм вылӧ. Со мый вӧсна Коммунист партиялӧн 14 конференцияыс тшӧктіс ёна видзӧдлыны газетӧ гижысьяс вылӧ, найӧ содӧм вылӧ.

Миян Коммунист партияса ячейкаяс сиктъясын оз на видзӧдны, кыдзи эськӧ колӧ вӧлі, газетӧ гижысьяс вылӧ, найӧ удж вылӧ. Уна коммунист на оз тӧд миянлы газетӧ гижысьяс коланлунсӧ, абу на тӧдсаӧсь, дай омӧля зільӧны тӧдмасьны газетӧ гижысьяс пӧвстын удж йылысь. На пӧвстын партиялӧн уджыс эськӧ зэв уна. Колӧ газетӧ гижысьясӧс содтыны.

Колӧ найӧс ӧтувтны. Колӧ найӧс велӧдны миян ногӧн мӧвпавны да уджавны (воспитать). Колӧ найӧс матыстны партия бердӧ, тӧдмӧдны партия дай Сӧвет власьт уджӧн.

Тайӧ уджсӧ ставсӧ вермасны вӧчны партия ячейкаяс. Тайӧ уджсӧ газетӧ гижысьяс пӧвстын партия ячейкаяслы, 14 конференция тшӧктӧм серти, колӧ босьтчыны чорыда нуӧдны. Газетӧ гижысьяслы сиктъясын абу дзик кокни ассьыныс уджнысӧ нуӧдны. Налы уджавнысӧ партия ячейкаяслы быд ногӧн колӧ зільны отсавны. Сэсся колӧ отсавны газетӧ гижысьяслы ӧтувтчыны «газетлы отсасян» кружокъясӧ, пыртны сэтчӧ сиктса мукӧд йӧзӧс дай отсавны кружокъясыслы уджсӧ нуӧдны. Мукӧд губерняясын татшӧм кружокыс уна нин эм, миян обласьтын весиг ӧти сиктын на абу. Сэсся колӧ газетӧ гижысьясӧс зільны пыртны политграмота велӧдан кружокъясӧ.

Медым партия ячейкаяс бурджыка вермасны нуӧдны газетӧ гижысьяс пӧвстын уджнысӧ, колӧ тӧдмасьны сійӧ уджнас. Та вылӧ эм журнал «Рабоче-крестьянский корреспондент». Тайӧ журналсӧ быд коммунистлы колӧ судзӧдны.

Партия ячейкаясӧн бура газетӧ гижысьяс вылӧ видзӧдлӧмӧн, на пӧвстын удж нуӧдӧм вылӧ босьтчӧмӧн ми ещӧ на содтам унджык газетӧ гижысьясӧс, ми ещӧ на ӧдйӧ вермам бурмӧдны Сӧвет власьтлысь уджсӧ сиктъясын, ми ещӧ на унджык уджалысь йӧзӧс регыдджыкӧн кыскам Сӧветъяс удж лӧсьӧдӧмӧ.