БАТЕНЬКА ДА КАТЕНЬКА

(Кулӧмдін уезд)

Мысса «бурсьылысьяслы» и мукӧд енлы эскысьяслы тайӧ гижӧд бӧрас колӧ нин гӧгӧрвоны да дугдыны попъяслы кывзӧмысь.

Ӧні газет редакцияӧ воис кык юӧр (кык мортсянь), кыкнансӧ гижӧма ӧтитор йылысь: Мысын пӧ Опонька поп нывъяскӧд ноксьӧ. Гижӧны: «Зэв нин пӧ унаысь казявлӧмаӧсь; да-й ноксьӧмыд пӧ эськӧ абу и зэв дивӧ, да батюшкоыд пӧ дзебсьыныс зэв кужӧ».

Водзӧ гижӧны, кыдзи поптӧ аддзӧмаӧсь ӧтчыд.

«Корсьӧны вӧлӧм попаддяыс и мукӧд йӧз, да абу и сюрӧма. Недыр мысти корсьны кутасны енлы эскысь пӧрысь йӧз. Корсясны, корсясны, да коркӧ и сюрас: Анна гӧбӧч гуын попыд „выль попаддякӧд“ шмотвидзӧ»...

«Выль попаддяыс» — Катя нима ныв, яналӧмысь эз ёна и пов, а поптӧ вӧля вылас лэдзтӧдзыс ёна зэв янӧдӧмаӧсь. Сэки попыд вӧлӧм грӧзитӧ: «Он пӧ кӧсйӧ кувны, али мый?... Ог пӧ сьылӧд ни нинӧм!..»

Со ӧд грӧзыс! Тоша мужикъяс вӧлӧм воча шуӧны:

— Сьылӧдтӧмнад миянӧс эн повзьӧдлы, а тэнсьыд юрситӧ шырам!

— Шырӧй кӧть энӧ, а ме Катяысь ог лэдзчысь (!)... Юкся бабаысь... Попалӧмысь дугда (!)

Со ӧд кутшӧм муса вӧлӧма Катяыд!

Ӧтиыс ещӧ гижӧ сідз: «Попӧс пӧ гусьыс кыскӧмаӧсь; коді юрӧдыс, коді кокӧдыс, коді голяӧдыс; сэсся ёна и тэчӧмаӧсь кулакнаныс мышкуас, сьыліас и мукӧдлаӧ».

_____

Ӧні сэсся неуна позьӧ содтыштны.

Батенька да Катенька, кор найӧс лэдзисны, дерт кӧнкӧ гортаныс мунісны. Батенькалӧн маменькаыс навернӧ, сэсся, кутіс юасьны:

— Кытчӧ ветлін, батенька?...

— Анна ордӧ, маменька...

— Мыйла, мыйла, батенька?...

— Катя дінӧ, маменька...

— Код нӧ корсис, батенька?...

— Кевмысь йӧзӧй, маменька...

— Кысь нӧ сюрин, батенька?...

— Гӧбӧч гусьыс, маменька...

— Грешитін эн, батенька?...

— Ен мед видзас, маменька...

Навернӧ и Катенькалысь юасис аслас папенькаыс:

— Кытчӧ вошлін, Катенька?...

— Гӧбӧч гуӧ, папенька...

— Кодкӧд вӧлін, Катенька?...

— Батюшкокӧд, папенька...

— Мый сэн вӧчин, Катенька?...

— Дурим сӧмын, папенька...

— Ньӧрйӧн, ньӧрйӧн, Катенька!..

— Сёр нин, сёр нин, папенька...

Максим Зоркӧй.