ӦЗИМ СЁЙЫСЬ НОМЫР (ЛЁЛЬӦ)
Кытысь лоӧ номыр.
Сыктыв уездувса Лузйывса вӧлӧсьтъясын мӧд во чӧж нин сю ӧзимъяс сёйӧ номыр-гаг. Колян арын сійӧ бара ёна пакӧститӧма, сёйӧма ӧзимсӧ дасӧд юкӧдсӧ кымын. Ёнджыкасӧ сёйӧма Лузйыв, Лэт вӧлӧсьтъясын дай тшӧтш локтӧма Ловля сиктӧдз Ношульса вӧлӧсьтӧ.
Крестьяна мӧвпалӧны — сійӧ номырыс пӧ усьӧ омӧль кымӧрысь. Кыдзи-мый сійӧс колӧ вины, не лэдзны рӧдмыны — оз тӧдны.
Та кузя ме и кӧсъя сёрнитны. Медводз колӧ шуны: номыр некысь оз киссьы, кымӧрысь оз усь. Сійӧ рӧдмӧ миян муяс вылын да боръясын; мӧд-кӧ — номыр чужӧ быдсяма сикас гаг позтырысь (колькйысь). Номырыд — гаг пиян.
Тайӧ сю ӧзим сёйысь номыръясыд — неыджыд руд войся бобув (пӧльӧбобӧ) пиян. Чужӧны бобув позтыръяссьыс.
Тайӧ бобулыс рӧдмӧ со кыдзи: гырысь номыръясыс тӧвйӧны му пиын. Найӧ мусинвыв руд рӧмаӧсь. Кор уна сёйӧны ӧзимсӧ, лоӧны вель гырысьӧсь.
Тулыснас, май тӧлысь помын, номыръяс му пиын вежсьӧны, лоӧны ичӧтик карандаш пом кодьӧсь, гӧрдӧдӧны. Сэні найӧ оз нин сёйны, куйлӧны непыдын муас. Сідзи найӧ куйлӧны тӧлысь кымын. Юнь тӧлысь помын пӧрӧны бобулӧ. Кымынкӧ лун бӧрти заводитӧны тэчны мувывса ёгъяс вывъясӧ да боръяс вывъясӧ позтыръяссӧ (колькъяссӧ). Бобувъяс лэбалӧны сӧмын войяснас. Тӧдны найӧс сьӧкыда верман, сэтшӧмъясыс уна сикас да.
7−10 лун мысти позтыръяссьыс петӧны номыръяс. Найӧ медводзсӧ олӧны ёгъяс вылын ёна посниӧсь, ыджыда оз и тӧдчыны. Сӧвмыштӧм мысти боръясысь да ёгъяс вылысь вуджӧны ӧзим вылӧ, заводитӧны сёйны ӧзимсӧ. Медводз сёйӧны листъяссӧ. Сэсся гырысьджыкъясыс орӧдӧны ӧзимсӧ вуж дінӧдыс.
Сёйӧны ӧзимтӧ войнас. Луннас олӧны дзебсьӧмӧн му пиын да му комӧкъяс улын. Кор татшӧм номырыд уна рӧдмӧ, ӧзимтӧ кушӧдз сёйӧны.
Кыдзи вины номыръясӧс.
Ме шулі нин, мися, номыръяс рӧдмӧны ёгъяс вылын да боръяс вылын. Сы вӧсна унджыкысьыс ӧзимтӧ межа дорсяньыс и сёйӧны. Сідзкӧ, мед эськӧ номыр эз рӧдмы, колӧ коськӧмтӧ сідзи уджавны, медым бобув лэбзигас, юль тӧлысьын, коськӧм вылад эз вӧв некутшӧм ёг.
Сэсся боръястӧ колӧ косявны, лӧсьӧдны бор пыддиыс мӧд пас. Сэки бобулыд муяс вылысь лэбзяс мӧдлаӧ. Ёгтӧм коськӧмӧн да боръяс косялӧмӧн медъёна верман номыръяскӧд косясьны.
Сэсся номыр кӧ рӧдмӧма нин, эм нин да мед оз вудж мӧд му вылӧ, колӧ найӧс потшны канаваӧн. Канавасӧ вуджны номырыд оз вермы. Позьӧ канавасӧ кодйыштны сідзи: гӧрыштны пӧв-мӧд (вӧчны бӧрӧзда), стенъяссӧ да пыдӧссӧ бӧрӧздалысь ӧтйӧдны, медым стеныс лоӧ веськыд. Сэсся мусӧ гӧрыштігас колӧ лэптыны сійӧ бокас, кодарсяньыс номырыс сёйӧ.
Тадзи позьӧ медбура номыръяскӧд вермасьны, бырӧдны найӧс.
Татшӧм уджтӧ вермас вӧчны быд крестьянин. Сӧмын колӧ ӧтвылысь быдӧнлы босьтчыны. Сэки номыр сёйӧмтӧ он кут нин тӧдлыны. Тадзи вӧчӧны быдлаын, кӧні пакӧститчӧ сю ӧзим номыр.
Агроном Модянов.
