ПОЛЯКЪЯС БАРА КАВШАСЬӦНЫ

Харьков. Лепешевка-Шилики районын (Польша граничаын) юнь 28-ӧд лунӧ гранича дорас воисны кык польскӧй офицер; застава начальникыслысь кутісны требуйтны пырысь-пыр жӧ сетны налы Польшаысь пышйӧм мортӧс (перебежчикӧс); он кӧ пӧ вит минутӧн сетӧй, «война объявитам». Вит минут бӧрын полякъяс кутісны лыйлыны миянлысь застава, вуджисны граничасӧ СССР-ладорӧ да кутісны наступайтны. Став уськӧдчылысьыс вӧлі 120 морт пехота да 20 морт кавалерия. Миян заставаын йӧзыс (войскаыс) вӧлі этшаджык, сы понда лои бӧрыньтчыны. Уськӧдчылысь полякъяс ӧзтісны заставалысь оланінсӧ (керкасӧ) да ранитісны застава начальниклы отсасьысь Бахлин ёртӧс. Лыйсисны ставсӧ час джын.

Юль 1-й лунлань паныд войнас полякъяс бара лыйлісны миянлысь застава. Миян заставасянь лыйсисны воча. Асывнас полякъяс бӧрыньтчисны бӧр. Миянсянь наблюдайтігӧн аддзисны: Польшаладорын зэв зіля лӧсьӧдчӧны косясьны, кодйӧны окопъяс, нюжӧдалӧны сутуга потшӧсъяс (проволочнӧй загражденньӧ), вӧчалӧны оруддьӧяслы да пулемётъяслы площадкаяс. Уськӧдчылысь полякъяс вӧліны защитнӧй рӧма паськӧмаӧсь; найӧ неӧтчыд нин ошйысьлісны гранича видзысь гӧрдармеечьяслы, регыд пӧ Польша объявитас СССР-лы война.