КООПЕРАЦИЯ ДА МӦДА-МӦДЛЫ ОТСАСЯН КОМИТЕТЪЯС
Мӧда-мӧдлы отсасян комитетъяс сиктъясын медъёна ӧтувтӧны-ӧтлаалӧны крестьянаӧс.
Мукӧдлаас сы кындзи найӧ нуӧдӧны ыджыд кӧзяйствояс: уджалӧны видз-му, кутӧны мельничаяс, кутшӧмсюрӧ заводъяс да сідз водзӧ. Сы вӧсна колӧ торйӧдны кооперациялысь да мӧда-мӧдлы отсасян комитетъяслысь уджсӧ, мед найӧ оз торкны мӧда-мӧднысӧ да мед ассьыныс уджсӧ бураджык вӧчисны. Сэсся колӧ, мед найӧ пыр тӧдісны мӧда-мӧдныслысь уджсӧ да уджалісны ӧтвылысь. Сідзи уджалӧмӧн вермасны кыпӧдны, ёнмӧдны уджсӧ кооперациялысь дай мӧда-мӧдлы отсасян комитетыслысь. Найӧ торъя туйӧд мунӧны кыкнаныс ӧтилаӧ: кыпӧдны овмӧс гӧль крестьяналысь, мездыны найӧс кулакъяс кипод улысь.
Мӧда-мӧдлы отсасян комитетъяслы, Ставсоюзса мӧда-мӧдлы отсасян комитетъяс 3-ӧд съезд шуӧм серти, колӧ став кӧзяйствоса уджсӧ нуӧдны кооперативъяс пыр. Лавкаяс налы кутны некутшӧмӧс оз позь, найӧс ставсӧ колӧ сетны дзикӧдз кооперативъяслы.
Кутшӧмкӧ кӧ производство кутӧ мӧда-мӧдлы отсасян комитетыс, сійӧ уджсӧ колӧ кооперативкӧд сёрнитӧмӧн нуӧдны. Сэтшӧм уджысь ёнмас комитетыс да кооперативыс.
Сэсся мӧда-мӧдлы отсасян комитетъяс вывті ёна вермасны отсавны гӧль крестьяналы пырны шленъясӧн кооперативӧ да кыскыны кооператив уджас. Комитетыс мынтӧ гӧль крестьяна пыдди пыран да паевӧй взносъяссӧ. Мӧда-мӧдлы отсасян комитетыс кӧ корӧ кооперативлысь кутшӧмкӧ гӧлиник крестьянинӧс мездыны пыран да паевӧй взносъяссӧ сетӧмысь, кооперативлы колӧ гӧгӧрбок видзӧдлыны да, позьӧ кӧ, мездыны сійӧс.
Колӧ вӧчны сідз, мед став мӧда-мӧдлы отсасян комитетысь шленъясыс вӧліны кооперативын шленъясын. Сідзи вермасны медъёна ӧтувтны кооператив крестьянакӧд.
Кооперативса правленньӧясӧ, ревизионнӧй комиссияясӧ да лавкаса комиссияясӧ колӧ кыскыны уджавны вежӧраджык да зільджык йӧзӧс мӧда-мӧдлы отсасян комитетъясысь.
Сӧмын оз ков комитетъяслы асьнысӧ пуктыны кооперативъяс местаӧ. Оз ков вунӧдны: кооператив вылын командуйтӧмӧн позьӧ сӧмын кооперативсӧ вынтӧммӧдны. Мӧдарсяньыс, кооперативлы колӧ тӧдны, мый мӧда-мӧдлы отсасян комитетъяс налӧн медъён отсасьысьяс.
Ставмувывса кооперация лунӧ мӧда-мӧдлы отсасян комитетъяслы колӧ ёнджыка ӧтувтчыны кооперативъяскӧд.
Й. Xотинскӧй.
