КООПЕРАЦИЯЛӦН СТАВЙӦЗКОСТСА ЛУН
Быд во юль тӧлысьын медводдза субӧтаӧ быд йӧз пытшкын, кытӧн эм кооперативъяс, празднуйтсьӧ кооперациялӧн ставйӧзкостса лун.
Сійӧ лунӧ став уджалысь йӧзлы колӧ зіляджык, гӧгӧрбок видзӧдлыны асланыс кооперативъяс вылӧ да пасйыны, кыті-мый бур, кыті-мый лёк.
Сійӧ лунӧ став уджалысь йӧзлы колӧ ёнджыка ӧтувтчыны кооперативъясӧ да сьӧм пуктӧмӧн ёнмӧдны-вынсьӧдны найӧс.
Сійӧ лунӧ колӧ видзӧдлыны бӧрвыланым — мунӧм туй вылас — да шуны, кыдзи колӧ уджавны водзӧ кежлӧ, кыдзи бырӧдны кооперациялысь висьӧмъяссӧ да ёнджыка ставнымлы ӧтувйӧн босьтчыны сійӧ уджъясӧ.
Миян кооперация тайӧ воясӧ кыптіс да паськаліс буракодь. Став СССР пасьта миян эм кызь ӧти сюрс потребит. общество. Сэтчӧ ӧтувтӧма кӧкъямыс миллион морт-пайщик. Миян Коми обласьтын кооперативъясӧ ӧтувтӧма матӧ кызь сюрс.
Потребит. кооперация донтӧм тӧвар вайӧмӧн сетіс уджалысь йӧзлы зэв уна кокньӧд. Ньӧбан-вузасян удж сылӧн век водзысь водзӧ паськалӧ.
Сельхоз. кооперация сідзи жӧ ёна содӧма. Ӧні сылӧн СССР пасьта эм нелямын сюрс унджык кооперативыс. Ӧтувтӧма сійӧ матӧ куим миллион морт.
Мукӧд сикас кооперация сідзи жӧ кыптӧ водзӧ.
Уна бурторйӧдз став кооперация вермис воны уджалысь йӧз отсалӧмӧн.
Бурыскӧд орччӧн эмӧсь и лёкторъяс, ковтӧмторъяс. Медводз кооперативъяслӧн оз тырмы асланыс сьӧмныс. Сы понда найӧ ньӧбиг-вузасигад зэв ньӧжйӧ бергӧдчӧны, озджык вермыны кор колӧ вайны став коланторсӧ. Сьӧм тырмытӧмысла кооперативъяс пырӧны уджйӧзӧ. Сідзикӧн, сӧмын удждысьӧмӧн кооператив бура уджавны оз вермы.
Сэсся кооперативӧ ӧтувтчӧм йӧз ас кооперативаныс уджалӧны зэв этша, видзӧдӧны кооперативыс вылӧ кыдзи йӧз лавка вылӧ, а оз ас ӧтувъя кӧзяйство вылӧ моз. Дай бӧрйӧм йӧзыс мукӧдлаын оз матыстны асьнысӧ ӧтувтӧм шленъясыс дорӧ. Кооператив оз вермы бура уджавны, кор став шленъяс — пай пуктысьяс — асьныс оз кыпӧдны кооперативыслысь уджсӧ.
Сэсся уналаын учётъяс дырйи приказчикъяслӧн оз судзсьы тӧваръяс лёкногӧн ӧтувъя эмбур бырӧдӧм понда. Татшӧм ковтӧмторъяс ставыс кусӧдӧны кооперативтӧ, жугӧдӧны ӧтувъя уджтӧ.
Водзӧ кежлӧ колӧ сідзикӧн нуӧдны уджсӧ, мед татшӧмторъяс миян уджалысь йӧз кооперативъясын эз ло ньӧти. Колӧ бырӧдны быд кооперативысь став лёксӧ. Лёк висьӧмъяссӧ колӧ нетшыштны вужнас. Лёк уджалысьяссӧ кооперативъясысь колӧ зільны весавны. Колӧ гӧгӧрбок бурмӧдны-лӧсьӧдны уджсӧ. Ставсӧ тайӧ позьӧ керны сэки, кор став ӧтувтчӧм йӧзыс кутасны ставнаныс ӧтувйӧн отсавны кооперативъясас бӧрйӧм йӧзыслы.
Быд шленлы колӧ волыны быд шлен чукӧртчӧм вылӧ да лючки сёрнитны та йылысь.
Быд шленлы регыдӧнджык да тырӧдз колӧ пуктыны кооперативӧ ассьыс пайсӧ.
Быд шленлы колӧ вайӧдны кооперативӧ ставйӧзкостса лунӧ выль шленъясӧс да висьтавны налы, кыдз колӧ кооперативтӧ ловзьӧдны.
Уджалысь йӧзлы ньӧбасьны-босьтасьны колӧ кооперативысь. Оз ков мунны купеч ордӧ. Кор кооперативыд ёнмас, сэки купеч ачыс кусӧ, ёнмас кӧ купечыд — нёль кучик пондас кульны.
Кӧзяйствоысь лишаланторъяс да прӧмыс вайӧмтор крестьяналы колӧ вузавны сӧмын кооперативӧ. Сы вылӧ кооперативыд вермас вайны тӧвартӧ донтӧмджыка дай бурджыкӧс. Кооперативад вузалӧмыд ёнмӧдӧ кооперативтӧ дай крестьянинтӧ асьсӧ.
Том йӧзлы колӧ ставыслы пырны кооперативӧ да тшӧтш кыпӧдны сылысь уджсӧ. Том йӧзлы ковмас коркӧ вежны кооперативъясысь пӧрысьмӧм уджалысьясӧс. Кооперация виччысьӧ том йӧзсянь отсӧг, виччысьӧ выль уджалысьясӧс.
Нывбабаяслы сідзи жӧ колӧ зіля отсавны кооперациялы. Кооперация нывбабалы вермас сэки сетны зэв ыджыд отсӧг; сійӧ синмӧдӧ-пельсьӧдӧ нывбабаӧс, вайӧдӧ югыд бур ӧтувъя олӧмӧ.
Ставйӧзкостса кооперация лунӧ быд уджалысь мортлы колӧ ёнджыка тӧдмавны кооперацияыдлысь оланногсӧ да Ленинлысь тшӧктӧм-индӧмсӧ. Тайӧ лунӧ колӧ казьтыштны, мый Ленин тшӧктіс ӧтувтны кооперативъясӧ став уджалысь йӧзӧс, мый сӧмын кооперация пыр уджалысь йӧз воасны югыд бур олӧмӧ.
