НЫВБАБАЯС, БОСЬТЧӦ ОТСАВНЫ КООПЕРАТИВЛЫ!

Миян Сӧвет Республикаын кооперативъяс ёна нин паськалӧмаӧсь. Сӧмын уна кооперативын на уджъясыс оз мунны бура.

Талун колӧ бурджыка видзӧдлыны кооперативъяс вылӧ, мӧвпыштны уджъяссӧ бурмӧдӧм йылысь.

Нывбабаяслы-кӧзяйкаяслы, мамъяслы медъёна лоӧ волывлыны кооперативӧ, медъёна лоӧ тӧждысьны семья вӧсна да корсьны донтӧм да бур тӧвар.

Кооперативъяс асланыс донтӧм да бур тӧварӧн ёна вермасны кокньӧдны нывбабалысь семья вӧсна тӧждысьӧмсӧ. Видз-му уджалан кооперативъяс да артельяс вый вӧчан да мукӧд сикас ӧтувъя машинаяс лӧсьӧдӧмӧн ёна вермасны бурмӧдны овмӧс крестьянкалысь. Кооператив пыр нывбаба вермас судзӧдны став коланторсӧ сӧстӧма да бурджыка кагасӧ быдтыны.

Кооперативъяслы уджсӧ пуктыны колӧ отсавны. Отсавныс вермасны сӧмын шленъяс. Нывбабаяс пиысь кооперативын шленыс зэв на этша. Найӧ ветлывлӧны сӧмын кооперативӧ ньӧбасьны, а удж вылас оз видзӧдлыны.

Быд шлен — кооперативлӧн кӧзяиныс, шленъяс собранньӧ вылын бӧрйӧны правленньӧ, ревизионнӧй комиссия, сёрнитӧны став уджсӧ пуктӧм йылысь. Сӧмын шлен собранньӧ вылын вермас висьтавны лёкторъяс йылысь да индыны удж бурмӧдан туйсӧ.

Нывбабаяс унаӧн оз вермыны шленӧ пырны шленскӧй взнос вӧсна. Дерт, взностӧ мынтыны колӧ сьӧм, да ӧд ӧтпырйӧ сьӧмыс ставыс оз босьтсьы, босьтсьӧ уна срокӧн ичӧтикаӧн.

Унджык нывбабаыс оз пырны кооперативӧ асланыс неокоталун вӧснаыс: мед пӧ мужикъяс пырасны — нывбабалы пӧ сэтчӧдз ичӧт мог. Унаӧн на оз гӧгӧрвоны, кутшӧм кокньӧд-отсӧг вайӧ нывбабалы кооперативӧ пырӧм, кӧні сійӧ ӧтвылысь мужикъяскӧд кутас бурмӧдны ассьыс олӧмсӧ. Колӧ тӧдны — нывбабатӧг кооперативлӧн удж оз ёнмы.

Сӧмын сэки, кор став уджалысь нывбабаыс пырасны кооперативӧ да босьтчасны чорыда сэні удж лӧсьӧдны — вермас кокнявны регыдджык налӧн олӧм!

А. П.