КООПЕРАЦИЯЛӦН СТАВМУВЫВСА ЛУН
1922 воын Ставмувывса Кооператив Союз лӧсьӧдіс празднуйтны юль тӧлысьын медводдза субӧтанас ставмувывса кооператив лун. Коймӧд во нин кооператоръяс празднуйтӧны тайӧ лунсӧ. Некутшӧм государствоын на тайӧ луныс эз мунлы сэтшӧм паськыда, кутшӧма миян Сӧвет Республикаяс Союзын.
Таво тайӧ луныс усьӧ юль 4-ӧд лун вылӧ. Миян Коми обласьтын празднуйтӧны тайӧ лунсӧ аски. Тайӧ лунас став му вылын кооператоръяс видзӧдласны — уна-ӧ налӧн вынныс, кутшӧма да кыдзи нуӧдісны уджнысӧ, код ногӧн колӧ водзӧ кежлӧ уджавны.
Ми тӧдам, талун капиталист государствоясын кооперативӧ пырӧм уджалысь йӧз оз вермыны бура колльӧдны ассьыныс праздниксӧ. Ми тӧдам, Болгарияын уджалысь йӧзлысь вир юысь Цанков, Германияын сар дор сулалысь да «ен нога» Гинденбург, мукӧд асланыс государствоясын оз лэдзны рабочӧйяслы да крестьяналы петкӧдлыны выннысӧ.
Ми тӧдам, сӧмын Сӧветъяс Союзын кооперативъяс вермасны паськыда нуӧдны ассьыныс праздниксӧ, сӧмын Сӧветъяс Союзса кооперативъяс ёна шыӧдчасны Ставмувывса Кооператив Союзса чукӧстчӧмлы.
Сӧмын сэні бура вермас кыптыны да паськавны кооперация, кӧні власьтыс уджалысь йӧз киын. Капиталист государствоясын тайӧ оз вермы лоны. Важ кооператоръяс шуӧны вӧлі — ми пӧ бурӧн, косьтӧг, ӧтвылысь капиталистъяскӧд уджалӧмӧн вуджам капитализмсянь социализмӧ, воам социализмӧ. Ленин ёрт тайӧ шуӧмсӧ жугӧдіс, петкӧдліс — тайӧ шуӧмыс абу збыль, Ленин ёрт шуліс: некор пӧ оз позь кооперативъясӧ йӧзӧс куш пыртӧмӧн капиталистъясӧс тшӧктыны мунны ӧтув рабочӧйяскӧд. Некор он вермыв йӧзӧс куш пыртӧмӧн кооперативъясӧ дугӧдны рабочӧйясӧс вермасьны, косясьны капиталистъяскӧд. Сӧмын тайӧ косясьӧмнас, сӧмын власьтсӧ рабочӧйясӧн ас киӧ босьтӧмӧн верман шыбитны ыджыдалӧмсӧ капиталистъяслысь рабочӧйяс вылын, сӧмын сэки верман дугӧдны капиталистъясӧс рабочӧйяслысь пӧсьсӧ кисьтӧмысь, ас выланыс, ас зептаныс рабочӧйясӧс уджӧдӧмысь. Сэки жӧ Ленин ёрт индіс — кутшӧма пӧ вежсис кооперациялӧн удж нуӧдӧмыс Сӧвет власьтын.
Ставмувывса кооперация лунӧ миянлы колӧ мӧвпыштны Ленин ёртлысь шуӧмсӧ: сувтӧдны, ёнмӧдны кооперация, кытчӧ пырӧмаӧсь, кӧні уджалӧны йӧзыс. Талун ещӧ на колӧ шуны — сӧмын кооперация пыр ми воам бур олӧмӧ, сӧмын кооперация пыр ми воам социализмӧ.
Сӧвет власьтын кооперация уджалӧм серти став мувывса уджалысь йӧз казяласны — сӧмын ас киӧ власьт босьтӧмӧн позяс бурмӧдны олӧм, позяс кокньӧдны уджалӧм.
Мед олас революцияногса кооперация!
