ЛЕКАРСТВОАЛӦМӦН КӦДЗӦМА ИД ДА БУРДЖЫК

Видз пинёвтӧма да бура артмӧма

Визин вӧлӧсьтын идъяс быд во аръядорыс висьмылӧны «шой шептӧн». Мукӧд воас сійӧ ёна идйӧс тшыкӧдлӧ. Таво тулыс Визинса сельскокӧзяйственнӧй тӧвариществоысь ӧти шлен, Цыпанов, агроном висьталӧм серти кӧдзис кык пуд ид проба вылӧ лекарствоалӧмӧн^Лекарствоалігӧн кӧйдыссӧ пызйӧны формалина ваӧн./^. Петасыс идйыслӧн зэв мича. Орчча му вылас лекарствоавтӧм кӧйдысӧн кӧдзӧма да, петігас сылӧн идйыс вӧлӧма кельыдджык.

Сійӧ Цыпановыс жӧ тулысын пинёвтӧма косӧд видз. Виддзыс ёна нин вӧлі нитшка. Став нитшсӧ чукӧртӧма пинёвтӧм бӧрас ӧти чукӧрӧ. Пинёвтӧмыс кӧть и сёр дай омӧля лоӧма да, пӧльзаыс ӧні нин синмад шыбитчӧ. Орчча видзьясыс тырӧмаӧсь виж юра купальничаӧн, а пинёвтӧм видз вылын купальничаыс петӧм кӧнкӧ-кӧнкӧ нин.

Сэтшӧм видзьяссӧ (ульсӧд видзьяс) бур овлӧ гӧрны да сэсся известкаавны, содтыны сэтчӧ минеральнӧй удобренньӧ. Сы бӧрын кӧдзлыны нянь уна пӧлӧс турун кӧйдыс сорӧн. Сідзи кӧ вӧчны, виддзыд лоас зэв бур туруна.