КЫДЗИ КОКНИДЖЫК КРЕСТЬЯНАЛЫ ЛӦСЬӦДНЫ БУР ПОРСЬЯСӦС
Миян обласьтын эм сӧветскӧй кӧзяйство «Улыс Чов». Видз-му удж нуӧдан управленньӧ тшӧктыліс сылы паськӧдны крестьяна пӧвстӧ бур, английскӧй рӧдысь порсьясӧс. Нёль воӧн сӧветскӧй кӧзяйство вель уна нин быдлаӧ разӧдіс порсьпиянӧс.
Сӧмын быд вӧлӧсьтӧ, быд сиктӧ сэтшӧм порсьясыд эз на вермыны веськавны. Зэв эськӧ мукӧдыс кӧсйӧны ньӧбны найӧс рӧд вылӧ да, ыджыд дон вӧснаыс оз вермыны. Донсӧ порсьяс вылӧ совхоз чинтыны оз вермы. Чинтас кӧ, убытка вылӧ воас. Барыш вылӧ сійӧ оз жӧ пыр. 5−6 вежонся порсьпиянӧс совхоз сетӧ 10 шайтысь. Дерт, гӧль крестьянинлы ӧтнаслы татшӧм донсьыд ньӧбнытӧ сьӧкыд.
Порсь рӧд паськалӧ зэв ӧдйӧ. Сы вӧсна сійӧс позьӧ лӧсьӧдны артельӧн. Сиктын пуктысьӧмӧн кык порсьпи ньӧбӧм вылӧ 20 шайттӧ вермасны чукӧртны. Порсьпиянӧс сэсся видзӧм вылӧ сетны судзсянаджык овмӧса морт киӧ. Порсь эньсӧ мортыслы тшӧктыны видзны рӧд вылӧ. Медым оз начкы эськӧ пиянасьтӧдзыс. Пиянасьӧм бӧрын видзысьыс сетӧ обществолы кык порсьпи, медбуръяссӧ общество бӧрйӧм серти. Сэки ыджыд порсьыс лоӧ аслас видзысьлӧн. Кыкнан порсьписӧ тӧлысьӧн-джынйӧн мысти чужӧм бӧрас общество бара сетас мукӧдлы нин. Судзсянаджык йӧз деревняын кольӧм порсьпиянсӧ вермасны ньӧбны.
Порсь айсӧ общество сетӧ видзны мӧдлы. Медым сійӧ мортыс видзис айсӧ куим арӧсӧдз. Сійӧ срок бӧрас вӧлисти сэсся вермас вӧчны порсьыскӧд, мый гажыс. Дерт, гӧльджык крестьянинлы порсьӧс куим арӧсӧдзыд сьӧкыд лоӧ видзны. Обществоӧн сылы колӧ сетны кутшӧмкӧ отсӧг: няньӧн-ӧ, запаснӧй видз-муӧн-ӧ, мукӧд сикасторйӧн-ӧ. Позьӧ отсӧг йылысь шыасьлыны волисполкомӧ.
Тадзи кӧ лӧсьӧдны, порсьыд сиктын зэв ӧдйӧ рӧдмас дай быд мортлы кокни лоӧ лӧсьӧдны бур порсь рӧд. Дерт, вуж рӧдсӧ пырысь-пыр жӧ колӧ страхуйтны кулӧмысь.
Кыдзи порсьясӧс видзны, кыдзи дӧзьӧритны, вердны да видзны доймӧмысь, видз-му удж нуӧдан управленньӧ сетас туйдӧд. Тайӧ уджсӧ зэв колӧ нуӧдны быд кооперативлы.
Ӧні «Улыс Чов» кӧзяйствоын сэтшӧм порсьпияныс разӧдӧм вылӧ эм 45 душ. Регыд кутасны найӧс вузавлыны. Гожся порсьпиян тӧвся дорысь босьтны бурджык.
Агроном Темноев.
