АВИАХИМ ОТСАЛӦ ВИДЗ-МУ УДЖАЛӦМЛЫ

ОДВФ да Доброхим неважӧн ӧні ӧтувтчисны ӧтилаӧ — Авиахимӧ (общество друзей воздушной и химической обороны). Тайӧ обществоыс отсалӧ правительстволы бурджыка лӧсьӧдны водзсасян кӧлуй мукӧд государствоясысь, кор найӧ уськӧдчасны миян вылӧ войнаӧн.

Авиахим обществолӧн уджыс абу сӧмын куш воюйтан кӧлуйяс лӧсьӧдӧмын. Сійӧ нуӧдӧ паськыд удж видз-му уджалӧмлы отсалӧмын. Авиахим лӧсьӧдалӧ ӧні виавны пӧдтан газъясӧн саранчаӧс, сусликъясӧс, кодъяс лунвывладорын ёна тшыкӧдӧны кӧдзаяс. Сэсся Авиахим лӧсьӧдчӧ вермасьны номъяскӧд, кодъяс паськӧдӧны кынтан висьӧм (малярия). Та вылӧ Авиахим таво сетӧ 20 сюрс пуд ядъяс.

Сэсся Авиахим висьтавлӧ крестьянаяслы, кыдзиджык колӧ му вынсьӧдны, медым содас урожай, кыдзиджык вермасьны кӧдза висьӧмъясӧн, сідз водзӧ. Та кузя сійӧ лӧсьӧдалӧ нарошнӧ крестьяналы петкӧдлӧм вылӧ му участокъяс, нуӧдӧ сэні удж. Татшӧм уджсӧ Мӧскуаса Авиахим таво нуӧдӧ 3 сюрс гӧгӧр муяс вылын. Татшӧм удж пырыс крестьяна аддзасны став коланлунсӧ Авиахимлысь, аддзасны, кыдзиджык колӧ химическӧй торъясӧн вынсьӧдны мунысӧ, кыдзиджык босьтны му вылысь унджык урожай.

Сідзкӧ сиктын Авиахим — ён отсӧг видз-му уджалӧмлы, быд нянь тшыкӧдысьысь видзчысьӧмлы. Став уджыс сиктын Авиахимлӧн та ногӧн и сувтӧдӧма.

Миян Коми муын Авиахим некутшӧм удж на оз вермы нуӧдны. Сійӧ ёна на омӧль миянын, омӧля на паськалӧма, омӧля на уджыс тыдалӧ. Тайӧ ставыс крестьянаӧн омӧля уджӧ босьтчӧмла. Крестьяналы колӧ кыпӧдны Авиахимтӧ, колӧ восьтавны сиктъясын Авиахим ячейкаяс, пырны сэтчӧясӧ. Авиахим ячейкаяс агрономъяс отсалӧмӧн вермасны асьныс судзӧдны му уджалӧм вылӧ химическӧй торъяс, асьныс видлавны муяс вынмӧдӧм уджъяс, мукӧдтор.

Крестьянаӧн тайӧ уджӧ босьтчӧмӧн ӧдйӧджык паськӧдас ассьыс уджсӧ видз-му уджалӧм кыпӧдӧм кузя Авиахим, дай ӧтпырйӧ ёнмасджык миян правительство.

С. П.