МЫЙТА ВӦЛӦСЬТЛЫ БЮДЖЕТАС СЕЛЬХОЗНАЛОГЫСЬ СЕТСЯС

Ми гижлім нин газетын, кыдзи таво сельхозналогысь пайыс кутас торйӧдчыны вӧлӧсьтувса бюджетӧ. Таво колян вося моз вӧлӧсьтувса бюджетӧ сетӧм вылӧ оз кут пуктыссьыны торъя надбавка. Таво сійӧ бюджетӧ торйӧдчӧ став сельхозналогыс. Гижлім тшӧтш — уна-ӧ сетсьӧ тавося сельхозналогысь.

Юнь 2-ӧд лунӧ Ставсоюзса Народнӧй Комиссаръяслӧн Сӧветыс лӧсьӧдіс, кутшӧм ногӧн колӧ юклыны бюджетсӧ быд губернялы, быд вӧлӧсьтлы.

Сійӧ лӧсьӧдӧм сертиыс, Сӧвет Республикаяслы быдӧнлы вӧлӧсьтувса бюджет вылӧ сетсьӧ сельхозналогысь, мыйта воӧ сійӧ Республикаяс пытшкас, 41½ %.

Сӧвет Республикаясыс вӧлӧсьтувса бюджет вылӧ быд асувса губерняяслы, обласьтъяслы оз нин сетны ӧтмында. Ӧткымын губернялы, обласьтлы сетасны ставнас сельхозналогсӧ, мукӧдъяслы — 50%, коймӧдъяслы — 30%, сідз водзӧ.

Медунасӧ сельхозналогысь сетасны сэтшӧм губерняяслы, обласьтъяслы, кодъяслӧн местнӧй бюджетас сьӧмыс мунӧ этша да кодъяслӧн сьӧмыс местнӧй бюджетас воӧ медэтша. Медэтшасӧ сетасны ыджыдджык рӧскода местнӧй бюджетӧн олысь губерняяслы, обласьтъяслы да кодъяслӧн асланыс бюджетас сьӧмыс воӧ унджык.

Губерняувса, обласьтувса исполкомъяс оз жӧ быд вӧлӧсьтлы сетны ӧтмоза налы сетӧм прӧчентсьыс сельхозналогысь. Гӧльджык вӧлӧсьтъяслы сетасны унджык, озырджыкъяслы этшаджык. Сӧмын губисполкомъяс, обисполкомъяс ни ӧти вӧлӧсьтӧс оз вермыны кольны мыйкӧ мында сельхозналогысь налы сеттӧг.

Народнӧй комиссаръяс Сӧвет шуӧм (постановленньӧ) серти, губисполкомъяс, обисполкомъяс оз вермыны кольны некутшӧм вӧлӧсьтӧс сійӧ бюджетӧ сеттӧг джын дорсьыс этшаджык, мыйта сетӧма губерняыслы, обласьтыслы. Шуам, миян обласьтлы Центр сетас став сельхозналогысь 80%. Обисполком некутшӧм вӧлӧсьтлы оз вермы сетны 40% этшаджык. Сідзкӧ, тавося закон серти, быд вӧлӧсьтса бюджетӧ сельхозналогысь мыйкӧ мында сетсяс.

Кутшӧм вӧлӧсьтлы мыйта кутасны сетны пайсӧ (прӧчентсӧ) сельхозналогысь, регыд лоӧ йӧзӧдӧма.