ГИДРОПЛАН АЛИ АЭРОПЛАН
Кодыс татчӧ локтӧ?
— Марпа, кывлін эн на нӧ тэ Сыктывкарас сӧрӧмсӧ? Локтӧ пӧ татчӧ ероплан!
— Локтӧ?.. Кыдзи нӧ сійӧ локтас?
— Кыдзи? Ме нӧ мыйӧн тӧда кыдзи. Небесаӧдыс пӧ тай локтӧ-а. Лэбзьӧ пӧ.
— Мун, вешйы сэтысь. Эн сӧр. Нинӧм абутӧ эн висьтав. Лэбзяс кутшӧмкӧ ероплан татчӧ мыйлакӧ. Ми огӧ бастуйтӧ да, лӧня олам. Еропланъясыд пӧ ӧд сӧмын бомба шыблавлӧны — висьтавлӧ вӧлі коркӧ менам Иванӧй. Ыджыд пиӧй... Кодыс тай война вылӧ ветліс.
— Чӧв, зонмӧ, бомба ӧд оз жӧ шыблав. Мыйла пӧ либӧ Сыктывкарса йӧзыс сэтшӧм нимкодя виччысьӧны. Овнысӧ дӧзмисны али йӧймисны! Ме ог тӧд сэсся. Эжва кузя пӧ тай сиктъясӧ волас и, быдтор-а.
— Дай ме ог верит, мыйыпӧштӧ эм кутшӧмкӧ ероплан, мыйыпӧштӧ морт вермас лэбавны. Абу ӧд сійӧ рака. Мед бара менам нэмӧн сэтшӧмторйыд оз жӧ ло.
Тадзи сёрнитӧны дзик туй шӧрын базар уличаын кык нывбаба. Тӧдчӧ — кыкнаныс локтӧмаӧсь карӧ ньӧбасьны сиктсянь.
Петіс Педтехникумысь ӧти ныв. Тыдалӧ, сэні велӧдчысь. Вӧлӧмкӧ, сійӧ тӧдса ӧти сиктса нывбабалы. Сувтӧдісны морттӧ.
— Олан-вылан, Анна! Мый нӧ ті карас керсянныд? Кутшӧм ероплан виччысянныд?
— Оз ӧд ероплан лок. Гидроплан. «Югыд туй»-ын вӧлі гижӧма.
— Но, ещӧ на бур. Кутшӧм нӧ гидропланыс?
— Ме нӧ мыйӧн тӧда, кутшӧм разнича сылӧн аэропланыскӧд. Локтас вот да видзӧдлам. Пуксяс пӧ тай Сысола рекаас-а, — шуӧ Педтехникумын велӧдчысь.
— Вӧйӧ. Пропадитасны ставныс.
...Локтӧ томиник морт. Морӧсас ичӧтик жӧч аэроплан. Кыліс нывбабаяслысь сёрнитӧ. Сувтіс на дінӧ.
— Том молодеч, аэроплан али гидроплан локтӧ татчӧ — Анна тай со шуӧ, гидроплан пӧ-а. Мыйла нӧ сійӧ локтӧ? Марпа со шуӧ — бомбаяс пӧ кӧсйӧ миян юр вылӧ лэдзавны.
— Бомбаяс, бомбаяс, бур тьӧткаяс. Сӧмын оз кут лэдзавны тіян юр вылӧ, а тіян вежӧрӧ. Медым ті тӧдланныд — аэроплан-ӧ, гидроплан-ӧ. Мыйла найӧс вӧчӧны. Кутшӧм бур наысь миянлы ставнымлы. Окотитанныд кӧ, тіянӧс тшӧтш кыпӧдлас, — кыввидзис томиник мортыд.
... — Ой, мый нӧ тайӧ?! — горӧдіс Марпа. — Мортыслӧн тай нӧ став чужӧмыс и, юрсиыс и са. Локтӧ ветламӧ.
Ставныс чуймисны. Видзӧдӧны. Марпа весиг котӧртыштіс, медым матісяньджык аддзылас негрӧс.
— Со тай, му вежан кадыд воис, — юрсӧ пыркнитіс Марпа.
