КОЛӦ БОСЬТЧЫНЫ ВЫЛЬ НОГӦН МУ УДЖАВНЫ

Шуасны кӧ заграничаын бурджыка нянь воӧм йылысь, ми пыр ыстысям дзик весьшӧрӧ омӧль му вылӧ. Миян Россияын, лунвывса бур чернозём муяс вылын, няньыс воӧ омӧльджыка заграничаса омӧль муяс вылын дорысь. Ставыс тайӧ видз-мунымӧс ӧнӧдз на омӧля, важ ногӧн уджалӧмла. Му уджалігӧн миян старайтчӧмным этша, дай кужӧмыс абу.

Миян крестьяна мунысӧ пыр на куш ӧти няньӧн вӧдитӧны. Быд во коймӧд юкӧныс кольӧ коськӧм улӧ. Быд во зэв ыджыд пласт куйӧдавны лоӧ. Куйӧд унджыкыслӧн оз тырмы. Сы вӧсна муыс изӧрмӧ. Невӧля лоӧ эновтчыны сэтшӧм мутӧ уджалӧмысь. Миянлы колӧ шыбитны тадзинад му вӧдитӧмтӧ. Колӧ заводитны муяс уджавны уна переменаӧн. Сэки весиг ӧти му пласт крестьяналӧн оз кут весьшӧрӧ куйлыны. Сэки крестьянинлӧн лоӧ унджык дай бур кӧрым скӧтлы, унджык вына куйӧд; сы вӧсна лоӧ унджык нянь.

Ме со дас вит во нин вӧдита аслам муяс вылын турун. Артмыліс зэв бура. Водзджыксӧ уна переменасӧ муяслы эг вермыв лӧсьӧдны. Ӧні кӧкъямыс восӧ муӧс вӧдита нин няньӧн, турунӧн да картупельӧн. Турунсӧ ӧти му вылын быдта кык во. Сы бӧрын кӧдзла сэтчӧ шабді да зӧр. Сэсся шабді да зӧр бӧрын коля сійӧ мусӧ коськӧм улӧ. Сэтчӧ петкӧда куйӧд да кӧдза сю. Сю бӧрын кӧдзла картупель да мӧс сёркни (таво сэтчӧ жӧ кӧдзи неуна мӧс вердан свеклӧ да морков); картупель, сёркни бӧрын кӧдза ид турункӧд.

1920 воын ме вӧлі Сыктывдінкарын сельскокӧзяйственнӧй курс вылын. 1923 воын ветлі Мӧскуаӧ выставка вылӧ. Сы бӧрын менам дум босьтіс переменасӧ му вӧдитӧмын бара вежны. Ӧні кӧсъя вежны переменасӧ сідзи, медым эськӧ быд во кык му вӧлі сюӧн кӧдзӧма. Картупель да турун вӧдитӧмысь ме ог орӧдчы. Ме гӧгӧрвои аслам 15 воӧн видласьӧмӧн — турун (бобӧнянь) му вылӧ вайӧ зэв уна пӧльза, кольӧ уна куйӧд. Куйӧдыс зэв бур, сетӧ мулы зэв уна вынсӧ. Сетӧ ён вын лыа муяслы, лыа-лякӧд да сёйӧд муяслы. Выныс турунлӧн муын олӧ уна во. Миян крестьяналы пырысь-пыр жӧ колӧ босьтчыны муяс вылӧ кӧдзны турун. Турун кӧдзтӧг овны сьӧкыд, бура овмӧдчыны он вермы.

Визинса крестьянин Илля Канов.