ФИНАНССА УДЖАЛЫСЬЯС СӦВЕЩАННЬӦ ВЫЛЫН

Колян вося серти таво нянь воас матӧ сюрс миллион пудйысь унджык. Мукӧд государствоысь нянь вылӧ вайны видз-му уджалан машинаяс. Миян Финанс Комиссариат да Госбанк уджалӧны бура.

Мӧскуа. Ставсоюзса финансса уджалысьяс сӧвещанньӧ вылын вӧчис доклад Народнӧй финанс комиссар Сокольников ёрт. Сійӧ шуис: ӧнія нянь быдмӧм серти пӧ позьӧ виччысьны нянь воӧм колян вося серти 800−900 миллион пудйӧн унджык. Тавося бур урожай ещӧ нин ӧддзӧдас СССР-са кӧзяйствоӧс кыпӧдӧм удж.

Ми вермам петкӧдны таво уна нянь мукӧд государствоясӧ да сэтысьяс сы вылӧ ньӧбны миянлы колан тӧвар — видз-му уджалан машинаяс, мукӧдтор. Бур нянь воӧм вӧсна крестьяна сельхозналогсӧ кутасны мынтыны срокъяс кежлӧ.

Сокольников ёрт бӧрын висьталіс мукӧд государство кост вузасян удж нуӧдысь комиссар (Наркомвнешторг) Красин ёрт (сійӧ неважӧн локтіс Францияысь). Красин ёрт шуӧ: заграничаын пӧ ёна сюся видзӧдӧны миян Финанс комиссариат да Госбанк удж вылӧ. Сэні пӧ ёна ошкӧны налысь уджавныс кужӧмсӧ да бура уджсӧ пуктӧмсӧ. Сӧмын пӧ бур уджалӧмыс рабочӧй да крестьяна правительствоыдлӧн, шуӧ Красин ёрт, — капиталист государствояслы сьӧлӧм вылас оз зэв во.