ЗАКОН НОГ УДЖАЛӦМ ДОР
Миян сиктъясын уналаын на оз уджавны Сӧвет власьтӧн лэдзӧм законъяс серти. Уналаын на Сӧвет власьтса законъяссӧ оз нуны олӧмас веськыда, кыдзи эськӧ колӧ. Уна норасьӧмъяс крестьянасянь та кузя воӧны удж нуӧданінъясӧ.
Оз этша юӧр сиктъясын не веськыда законъяс ног уджалӧм йылысь воӧ тшӧтш миян газет редакцияӧ.
Сэтӧні волисполкомса председательыс ыръянитӧ, оз тӧждысь крестьяна вӧсна, сэтӧні волисполкомын лёка сёрнитӧны йӧзкӧд, оз пыдди пуктыны найӧс, сэтӧні тӧдса кузя кокни быдтор босьтны, сэтӧні оз бӧрыньтчыны калым босьтӧмысь, сэтӧні милиционер лёка уджалӧ. Воӧны норасьӧмъяс и сиктын мукӧд удж нуӧданінъяс вылӧ.
Татшӧм не закон серти уджалӧмыскӧд Сӧвет власьт ёна вермасьӧ, корсялӧ туйяс, кыдзиджык эськӧ кокни нуӧдны тайӧ вермасьӧмсӧ.
Ставсоюзса Сӧветъяслӧн 3-ӧд съездыс шуис: «Ёнмӧдны вермасьӧм революцияногса законъяс торкысьяскӧд, калым босьтысьяскӧд, скӧра йӧзкӧд сёрни нуӧдысьяскӧд, омӧля йӧзлысь корӧмъяссӧ кывзысьяскӧд да вӧчысьяскӧд. Нуӧдны вермасьӧм ставсикас омӧль, не закон серти власьт нимсянь удж нуӧдысьяскӧд».
Сӧвет правительство нуӧдӧ тайӧ шуӧмъяссӧ олӧмӧ. Сідз, сійӧ зільӧ унджык крестьянаӧс бӧрйыны судӧ народнӧй заседательясӧн, зільӧ тӧдмӧдны паськыда крестьянаӧс законъясӧн, тшӧктӧ найӧс тӧдмӧдны. Закон ногӧн уджалӧм кузя Сӧвет правительство нуӧдӧ ещӧ мукӧд сикас удж.
Медым крестьяна бурджыка тӧдасны, кутшӧмджык мыжъяс общественнӧй удж нуӧдысьяслӧн, асланыс крестьяналӧн сиктъясын овлывлӧ, уна губерняын милиционеръяс асланыс уджалӧм йывсьыс висьтавлӧны йӧзлы.
Миян обласьтын милиционеръяслы татшӧм уджас колӧ жӧ кутчысьны. Сэсся веськыда закон серти уджалӧм вылӧ ёна видзӧдӧны прокуроръяс. Уналаын прокуроръяс ветлӧны тшӧкыда сиктъясӧ крестьяна пӧвстӧ, кывзӧны налысь норасьӧмъяссӧ, вештӧны нелючки уджалӧмъяссӧ.
Быд крестьянинӧн зільӧмӧн, быд крестьянинӧн кытчӧ колӧ юӧртӧмӧн нелючки уджалӧм йылысь, ӧдйӧджыка дай кокниджыка Сӧвет власьт вермас вуштыштны став не закон серти уджсӧ.
Ми селькоръясӧс корам ещӧ чорыдджыка видзӧдны да гижны газетӧ — кӧні мый найӧ казяласны Сӧвет власьтлысь законъяссӧ пыдди пуктытӧмӧн уджалӧмъяс.
