МОРТ ВИӦМЫСЬ ЮРӦД ОЗ МАЛАВНЫ

Юнь 6-ӧд лунын Сыктывдінкарын обласьтувса судын видлалісны делӧ Муравьёв Иванлысь, Туров Яковӧс сутшкалӧм йылысь.

Делӧыс вӧлӧма со кыдзи: таво февраль 28-ӧд лунӧ рытнас Сордӧ (Сыктыв уездын) локтісны код том йӧз Чулиб сиктысь. На пиын вӧлі тшӧтш Муравьёвыд. Муравьёв матькигтырйи пуртӧн уськӧдчис Яков Туров вылӧ да мышкас сылы пуртнад сутшкис. Туровыд вӧлі сулалӧ аслас сиктса морткӧд да сёрнитӧ.

Сійӧ сутшкӧмсьыс Туров регыд мысти кулі. Видлалӧм бӧрын врач шуис, Туровлы пӧ пуртыс пырӧма тыас. Туровлӧн коли кык посни челядь, пӧрысь мам да бабаыс.

Суд вылын Муравьёв лёкысь соссис, асьсӧ мыжаӧн эз лыддьы. Муравьёвӧн индӧм свидетельясыс пыр жӧ зілисны сійӧс мездыны. Сӧмын мукӧд свидетельясыс лючки ставсӧ висьталісны да, вӧлисти судыс аддзис Муравьёвыдлысь мыжсӧ. Обласьтувса суд судитіс Муравьёвӧс Уголовнӧй закон чукӧр 149-ӧд статьяса 2-ӧд юкӧдыс серти нёль во кежлӧ пукӧдны да мынтыны суд нуӧдӧм вылӧ петӧм рӧскод кызь вит шайт.

Сы кындзи суд шуис, Туров гӧтырӧн корӧм серти, Муравьёвлысь перйыны Туровлысь кык челядьсӧ да мамсӧ вердӧм вылӧ сьӧм. Сьӧмсӧ лоӧ мынтыны челядьыс быдмигчӧж. Унаӧн-ӧ тӧлысьнас ковмас мынтыны, лӧсьӧдас народнӧй суддя.

Судын уджалысь.