СОЦИАЛИСТЪЯС ЭЗ СУВТНЫ КИТАЙСА РАБОЧӦЙЯС ДОР

Германияса профсоюзъяслӧн Сӧветыс эз кӧсйысь отсавны китайса рабочӧйяслы.

Сӧмын Коммунист партия увтыртӧм йӧзӧс мездас

Берлин. Берлинын Гоминьдан партиялӧн организацияыс кӧсйис чукӧстчыны германияса рабочӧйяс дінӧдз, корны найӧс тшӧтш вӧчны демонстрация китайса йӧзӧс мукӧд государствоса капиталистъясысь мездӧм кузя. Чукӧстчӧмсӧ йӧзӧдтӧдз Гоминьдан партиялӧн организацияыс ыстыліс бӧрйӧм йӧзӧс германияса социалист партия комитетӧ чукӧстчӧмас кырымасьӧм вылӧ. Сӧмын комитетыс эз гижсьы, шуис: миян пӧ организацияыс ставмувывса да, куш китайса йӧзӧс мездӧм кузя огӧ пӧ вермӧй чукӧртавны собранньӧяс (!)

Ставгерманияса профсоюзъяслӧн Сӧветыс эз жӧ кырымав чукӧстчӧмсӧ. Сійӧ шуис, профсоюзъяслы пӧ политика уджӧ некутшӧм мог абу (!!)

Ӧні Гоминьдан партияыс шуӧ, сӧмын пӧ коммунист партия сьӧлӧмсяньыс отсалӧ кыпӧдчысь китайса рабочӧйяслы.