ПӦЖАРЪЯС ЛОӦМЫСЬ ВИДЗЧЫСЬӦЙ

Пӧжаръяс быд гожӧм уна лёк вайӧны крестьяналы. 1923 воын СССР пасьта вӧлӧма 70 сюрс пӧжар; сы пиысь сиктъясын вӧлӧма 65 сюрс пӧжар. Ставыс сотчӧма 150 сюрс крестьяна овмӧс. Та серти аддзам, мыйта вайӧны пӧжаръясыд убыткасӧ крестьяна кӧзяйстволы. Быд во дзикӧдз пӧжаръяс вӧсна уна сюрс крестьяна рӧзӧритчӧны.

Ӧні матысмӧ гожӧм. Гожӧмын медтшӧкыда лолывлӧны пӧжаръяс. Сэки медкокни кос кад вӧснаыс ӧзйыны керкаясыдлы.

Сы вӧсна сиктъясын ыджыд уджӧн колӧ лоны пӧжаръяскӧд водзсасьӧм. Быд сиктын колӧ лӧсьӧдавны пӧжарнӧй дружинаяс, заводитны судзӧдавны да важсӧ справитавны пӧжарнӧй машинаяс да мукӧд пӧлӧс пӧжар вылын колан кӧлуйяс. Быд крестьянинлы колӧ пырысьтӧм-пыр весавны ассьыныс пач трубаяснысӧ саысь, омӧльӧсь кӧ пачьясыд, выльысь тэчны, весавны керка гӧгӧръяс идзасъясысь, кос ёгысь.

Пӧжаръяскӧд водзсасьӧм уджӧ медся ёна колӧ кутчысьны вӧлӧсьтувса исполкомъяслы, сельсӧветъяслы. Налы сы кузя сетӧма ыджыд праваяс. Волисполкомъяс вермӧны лӧсьӧдавны обязательнӧй постановленньӧяс пӧжаръяскӧд водзсасьӧм кузя.

Сэсся волисполкомъяс бердӧ да сельсӧветъяс бердӧ колӧ лӧсьӧдавны торъя комиссияяс. Сійӧ комиссияясыслы колӧ видзӧдны, медым сиктса овмӧсыс вӧлі гӧгӧр лючки.

Пӧжаръясысь видзчысьӧм уджӧ колӧ ёна кутчысьны тшӧтш сиктса коммунист ячейкаяслы.

И. Ов-в.