БУРМӦДӦЙ ВИДЗ-МУ УДЖАЛӦМЛЫ УДЖДЫСЬӦМ

Видз-му вӧдитӧмлы ыджыд кокньӧд сетӧ удждысьӧм. Видз-му уджалӧмлы удждысьӧмсӧ Сӧвет власьт ӧні зільӧ быд ногӧн лӧсьӧдны паськыдджыка да бурджыка. Став сьӧмсӧ та вылӧ вӧлі сетӧма 150 миллион шайт гӧгӧр. Ӧні Ставсоюзса съезд шуис содтыны ещӧ 100 миллион шайт. Сэсся сійӧ жӧ съездыс шуис удждысян сроксӧ нюжӧдны дай удждысьӧмсӧ донтӧммӧдны.

Ӧні центрса сельскокӧзяйственнӧй банк шуис удждысян тӧвариществояслы дыр кежлӧ (5 воӧдз) удждысьӧм сетӧмысь босьтны 5 прӧч. во вылӧ, недыр кежлӧ (1 воӧдз) удждысьӧм сетӧмысь — 9 прӧч. Удждысян тӧвариществоясыслы тшӧктіс босьтны крестьяналы дыр кежлӧ удждысьӧмсьыс 7 прӧч., недыр кежлӧ удждысьӧм сетӧмысь — 12 прӧч.

Сэсся регыд центрса сельскокӧзяйственнӧй банк лӧсьӧдас быд удждысян тӧвариществолы, пырӧма кӧ сійӧ обласьтувса сельскокӧзяйственнӧй банкӧ шленӧн да ассьыс уджсӧ кӧ нуӧдӧ веськыда, сетны дыр кежлӧ, вит воӧдз, удждысьӧм кык сюрс шайт гӧгӧр. Лӧсьӧдӧны и мукӧдтор удждысьӧмсӧ кокньӧдӧм кузя.

Сӧмын ӧтнасӧн государство регыдӧн видз-му уджалӧмлы удждысьӧмсӧ бурмӧдны, сетны сійӧс кузьджык срок кежлӧ да донтӧгджык оз вермы. Тайӧ удж вылас колӧ кыскыны асьнысӧ крестьянаӧс, колӧ аслыныс крестьяналы отсавны.

Кыдзи отсавны? Кутшӧм отсалӧм вермас лоны крестьянасянь видз-му уджалӧмлы удждысьӧмлы? Медвойдӧр колӧ пыртны удждысян тӧвариществоӧ унджык крестьянаӧс. Крестьяналы колӧ зільны сетны тырӧдз паевӧй взносъяссӧ дай сетны регыдджыкӧн. Сэсся колӧ сетавны удждӧм сьӧмсӧ тӧвариществоысь срок тырӧм бӧртиыс пырысьтӧм-пыр.

Колӧ удждысян тӧвариществояслы паськыда сувтӧдны уджсӧ сідзи, медым крестьяна пукталасны ассьыныс сьӧмнысӧ тӧвариществоас. Сэки сӧмын тӧварищество вермас ёнджыка сувтӧдны удждысьӧмсӧ.

Удждысян тӧвариществоясӧ колӧ пуктыны сэтшӧм йӧзӧс, кодъяс эськӧ кужӧны вӧлі нуӧдны уджсӧ, кодъяс вылӧ эскӧны крестьянаыс, кодъяс уджсӧ бура нуӧдӧны, рӧскодъяс кытчӧкӧ бокӧ видзтӧг. Удждысян тӧвариществояслы оз ков сельхозбанкысь босьтӧм сьӧм вылӧ нуӧдны вузасян удж потребительскӧй обществоясын моз. Сылы босьтӧм сьӧмсӧ колӧ сетны крестьяналы видз-мунысӧ уджалӧм бурмӧдӧм вылӧ. Оз ков сьӧмсӧ сетны, удждыны быдӧнлы, кодсюрӧлы, колӧ сетны сӧмын кодлы сьӧмыс колӧ, сӧмын коді сійӧ сьӧмсӧ видзас видз-му уджалӧм нуӧдӧм вылӧ. Удждысян тӧвариществояслы колӧ зільны, медым быд удждӧм крестьянин бӧр вайис срок тырӧм бӧрти нюжӧдчытӧг.

Сэсся колӧ лӧсьӧдны, медым удждысян тӧвариществоясын эз вӧвны унаӧн дон вылӧ удж нуӧдысьяс. Колӧ зільны, медым сэні дон вылас уджалӧны вӧлі сӧмын кык морт.

Тадзи удждысян тӧвариществоӧн уджсӧ нуӧдӧмӧн, тадзи крестьянаӧн видз-му уджалӧмлы удждысьӧмлы отсалӧмӧн бурджыка позяс сувтӧдны да паськӧдны удждысьӧмсӧ.