М. П. СИДОРОВ

Тӧрыт асывнас вит часын том кадӧн кулі Коми нига лэдзанінса типографияысь наборщик Микайлӧ Петрӧвич Сидоров.

Сидоров ёрт чужлі 1899 воын Сыктывдінкарын. Бать-мамныс сылӧн — шӧркоддьӧма олысь крестьяна.

Омӧлика школаын велӧдчыштӧм мысти М. П. дас кык арӧсӧн пырис Следниковса типографияӧ велӧдчысьӧн. Следников быд озыр морт моз важ, сар дырйи ассьыс зепсӧ тыртӧм кузя велӧдчысьяслы дзонь куим тӧлысь некутшӧм дон уджалӧмсьыс эз сетлы. Куим тӧлысь мысти сэсся мынтӧ вӧлі ӧти шайтӧн тӧлысь. Сідзи жӧ сійӧ мынтыліс и М. П.-лы.

Типографияын свинеч бус пиын да краска дук пиын наборщикъяслы уджавны абу дзик кокни. Ещӧ нин сьӧкыд вӧлі уджавны Следников ордын. Сійӧ уджалысьяс вӧснаыд оз вӧлі тӧждысь. Ичӧтик вежӧсын уджӧдліс ӧтилаын дзонь дас мортӧс (прамӧй ногӧн кӧ, сэтшӧм вежӧсас позьӧ вӧлі уджавны сӧмын куим-нёль мортлы). Воздухыс этша, лолавны сьӧкыд. Уджавны лоӧ вӧлі дзонь дас кык да дас нёль час суткинас. Рытнас пӧ, уджалӧм бӧртиыс типографиясьыд петан да, шатлӧдлӧ, быттьӧ код мортӧс, — унаысь шулывліс Микайлӧ Петрӧвич.

Революция лоӧм бӧрти, кор типографияыс Следниковлӧн вуджис государство киӧ, Микайлӧ Петрӧвичлӧн дзоньвидзалуныс вӧлі торксьӧма нин. Унаысь тайӧ бӧръя воас нин сійӧ норасьлывліс: ме пӧ ассьым дзоньвидзалунӧс вошті Следников ордын уджалӧмла.

Сидоров ёрт вӧлі зэв зіль уджалысь. Сійӧ эз лыддьывлы аслас уджын час лыдтӧ. Коми кыв вылын наборщикъяс пиысь Микайлӧ Петрӧвич вӧлі медбур наборщикыс.

Следников ордын да гражданскӧй война воясӧ ёна уджалӧмыс нетшыштіс Микайлӧ Петрӧвичлысь дзоньвидзалунсӧ. Сійӧ висьліс чакоткаӧн. Колян тӧвсянь эз нин вермыв уджавны, водтӧдіс висьӧмыс. Кулі 26 арӧсӧн.

Нэм кежлӧ муніс миян дінысь Сидоров ёрт. Сійӧс казьтылӧмыс кольӧ миян пӧвстын, типографияын да газетын уджалысьяс пӧвстын.

Эн пӧ.