ЛОКТӦ ГИДРОПЛАН

Юнь 16-ӧд лунӧ Мӧскуаысь лэбис «Авиахим лицом к деревне» нима агитсамолёт. Сійӧ кӧсйӧ лэбны татшӧм маршрутӧн: Мӧскуа, Касимов, Муром, Горбатов, Н.-Новгород, Васильсурск, Чебоксары, Чистополь, Сарапул, Перым, Усолльӧ, Чердін, Сыктывдінкар, Котлас, Ростовское, Кардор, Онега, Наволоцк, Каргополь, Белозерск, Рыбинск, Калязин, Твер, Мӧскуа. Лэбас Ока, Волга, Кама, Эжва, Двина, Онега юяс кузя.

Сувтланінъясас самолёт кыпӧдлас 1600 мортӧс, пондас разӧдны литература, петкӧдлыны лэбалӧм йылысь кинолентаяс.

Тайӧ лэблігӧн уна сюрс йӧз медвойдӧр на аддзыласны лэбалан машинатӧ, гӧгӧрвоасны сылысь коланлунсӧ, да кодсюрӧ лэбласны сы вылын.

Самолёт волӧм бӧрын ӧдйӧджыка пондас чукӧрмыны сьӧмыд «Коми морт» нима самолёт вылад.