ГОЖӦМЫН КРЕСТЬЯНКАЛЫ МЕДЪЁНА КОЛӦ ЧЕЛЯДЬ ЯСЛИ

Матысмӧны гожся уджъяс. Став крестьянкалы ковмас петны уджавны видз вылӧ. Посни челядьӧс лоӧ колявны гортаныс кутшӧмсюрӧ кага видзысьясӧн либӧ весиг ӧтнанысӧ. Бура видзтӧг челядьӧс гожӧмын овлывлӧ уна пакӧсьт: уна челядь нэмыс кежлӧ тшыклӧны, унаӧн кулавлӧны.

Сы вӧсна челядь яслияс лӧсьӧдӧм йылысь ёна колӧ мӧвпыштны да нуӧдны сиктъясын медводдза уджӧн.

Челядь яслияслысь бурлунсӧ да коланлунсӧ крестьянкаяс кутісны гӧгӧрвоны нин. Яслияс сиктъясын воысь воӧ пыр содӧны.

Дерт, челядь яслияс лӧсьӧдавны колӧ сьӧм. Отсавны сьӧмӧн либӧ мукӧдторйӧн челядь ясли восьтӧм кузя колӧ вӧлӧсьтувса исполкомъяслы, кооперативъяслы, мӧда-мӧдлы отсасян комитетъяслы. Медъёнасӧ лоӧ отсавны аслыныс крестьяналы; отсавны мыйӧн коді вермас — сьӧмӧн либӧ мукӧдторйӧн (колькйӧн, йӧлӧн да сідз водзӧ).

Челядь ясли восьталӧм вылӧ, дерт, некутшӧм налог некодлы оз ло; тайӧ лӧсьӧдӧм вылӧ колӧ отсавны некод боксянь тшӧктытӧг, ас окотанас быд мортлы.

Медъёнасӧ тайӧ удж бердас колӧ кутчысьны делегаткаяслы, йӧзӧс югдӧдан удж нуӧдысьяслы дай быд крестьянкалы.

Сійӧ уджас жӧ колӧ кыскыны пельшӧрӧс, агрономӧс, школаын велӧдысьясӧс. Найӧс колӧ тшӧктыны вӧчавны докладъяс крестьяна пӧвстын челядь ясли йылысь.

Яслияс лӧсьӧдалӧмӧн сиктса нывбаба вермас аслас кӧзяйствоын ёнджыка уджавны. Яслияссӧ лӧсьӧдалӧм уджӧн крестьянка заводитчӧ нуӧдны обществоса удж.

Е. Т.