ТШӦКЫДДЖЫКА ВӦЧАВЛӦЙ ВОСЬСА ЧУКӦРТЧЫЛӦМЪЯС
Коммунист ячейкаяс сиктъясын ассьыныс собранньӧяссӧ унджыксьыс нуӧдӧны крестьянаӧн паськыда тӧдлытӧг. Пӧшти став ячейкаса собранньӧяс вылын овлӧны сӧмын коммунистъяс. Ячейкаяс оз зільны крестьянаӧс кыскыны асланыс собранньӧясыс вылӧ, кӧть и собранньӧ вылас сувтӧдӧм сёрни сертиыс ёна колӧны унджык крестьяна — беспартийнӧй крестьяна. Сы вӧсна коммунист ячейкаяс аслас уджӧн оз на тӧдчыны, тыдавны крестьяна син водзын, кыдзи эськӧ тӧдчынысӧ вӧлі колӧ. Весиг мукӧд сиктъясын крестьянаыс оз и тӧдны, эм-абу сиктас коммунист ячейкаыс, овлывлӧ оз сылӧн собранньӧяс. Шуасны: эмӧсь пӧ тай миян сиктын кык-ӧ, куим коммунист, да чукӧртчывлӧны оз коръясӧкӧ, огӧ тӧдӧй.
Восьса собранньӧяс коммунист ячейкаяслӧн, кытчӧ воласны унджык беспартийнӧй крестьяна — зэв колантор.
Сэтшӧм собранньӧясыс сетасны ыджыда крестьянаӧс партия уджӧн, удж сямнас тӧдмӧдӧм, дай ячейкаыс, сыкӧд тшӧтш став партия, тӧдчыныджык кутасны крестьяна пӧвстын. Крестьяна ёнджыка кыссьыны кутасны сӧветъяс уджӧ, на пиысь гӧгӧрвоысь да сьӧлӧмсянь сулалысьяс Коммунист партия дор пырасны партияӧ.
Сэсся восьса собранньӧяс пыр, кӧні крестьяна юасьӧны докладысь гӧгӧрвотӧминъяссӧ, тшӧтш доклад кузя сёрнитӧны, ячейкаяслы кокниджыка позьӧ тӧдмавны, кутшӧм крестьянин зільӧ тӧдмасьны партия уджӧн, кутшӧм крестьянин уджалас ӧтув партиякӧд, кутшӧм крестьянинӧс позьӧ босьтны партияӧ. Тайӧ ӧтар боксянь.
Мӧдар боксянь — восьса собранньӧяс коммунист ячейкалӧн сетасны ыджыд бур ячейкаса шленъясыслы бурджыка уджалӧм кузя, ёнджыка ловзьӧдас ячейкаса уджсӧ. Ячейкаса собранньӧ вылын, оз кӧ волыны сэтчӧ беспартийнӧй крестьяна, ячейкаса шленъясыс озджык зільны пыдӧджык тӧдмасьны уджӧн, озджык кывзыны докладъяс, озджык нуӧдны сёрнисӧ доклад кузя. Волывлыны кӧ кутасны ячейкаяс собранньӧ вылӧ беспартийнӧй крестьяна, кутасны кӧ найӧ сэні тшӧтш сёрнитны, дерт, ячейкаса шленъясыс ставныс нин кутасны чорыда уджнас тӧдмасьны, бурджыка быд удж йылысь мӧвпавны, медым вермасны лӧсьыда крестьяналы сійӧ удж йывсьыс висьтавны да, колӧ кӧ, крестьянинлысь висьталӧмсӧ веськӧдны.
Колӧ коммунист ячейкаяслы сиктъясын тшӧкыдджыка вӧчавлывлыны восьса собранньӧяс. Колӧ зільны, медым унджык беспартийнӧй крестьяна волывлӧны ячейкаса собранньӧяс вылӧ. Сэтшӧм собранньӧяс вылӧ колӧ сувтӧдны крестьяналы колантор йылысь сёрнияс дай докладъяссӧ вӧчавны гӧгӧрвоан кывйӧн. Зэв бур собранньӧяс чукӧртлывлыны прӧстджык кадӧ, уджавтӧм лунъясӧ.
Сэтшӧм ячейкаса восьса собранньӧясӧн коммунист ячейкаяс ёна партияӧс лэптасны крестьяна син водзын.
