ЗІЛЬӦНЫ БУРДЖЫКА ВИДЗ-МУ ВӦДИТНЫ

Зӧвсьӧрт сиктса (Емдін уезд.) крестьяна колян омӧль да няньтӧм вояссянь заводитчисны бурмӧдны да паськӧдны ассьыныс видз-мунысӧ. Ӧткымын крестьяна тайӧ уджын вӧчисны ёна нин уна. Босьтам кӧть «Кывтыдпом» сиктса крестьянинӧс Попов Степан Иванӧс. Сійӧ аслас семья выннас косьтіс ичӧтик нюр да вӧчис сэтчӧ му. Канавасӧ кодйӧма 60 сажень саяс. Колян во сійӧ му вывсьыс босьтіс нин сю.

Став муыс сылӧн войдӧр вӧлі чукля. Ӧні ставсӧ лӧсьӧдіс, веськӧдліс, эжасӧ торйӧдліс да сійӧн мусӧ куйӧдаліс. Став увтас муяс гӧгӧр кодъяліс канаваяс. Мукӧдысь ӧні сылӧн ӧзимъясыс пыр нин мичаджыкӧсь. Колян во няньсӧ мукӧд дорысь унджык жӧ босьтіс.

Видз-му бурмӧдӧмысь колян во Поповлысь налогсӧ чинтісны 25 прӧч. Попов эськӧ мӧвпалӧ на унатор вӧчны да, сӧмын сылӧн сьӧмыс абу, оз вермы мӧвпалӧм сертиыс вӧчнысӧ.

Татшӧм кӧзяйствоыс вӧлӧсьтас абу нин ӧти. Сӧмын омӧльтор сійӧ — вӧлӧсьтувса удж нуӧдысьяс мукӧддырйиыс оз зэв бура видзӧдны сэтшӧм кӧзяйствояс вылас.

Уездувса Видз-му юкӧдлы колӧ видзӧдлыны татшӧм кӧзяйствояс вылас да отсавны сӧветъясӧн. Сельхозналог босьтігӧн колӧ налы сетавны ыджыдджык кокньӧдъяс. Агрономъяслы колӧ видлавны татшӧм кӧзяйствояссӧ да индавны выль ногӧн видз-мусӧ уджавны.

Жгучий.