ВИДЗ-МУ УДЖАЛАН АРТЕЛЬ

Уджалӧны агроном индалӧм серти. — Шуисны сетны 15% общӧй фондӧ. — Сы вылӧ ньӧбасны машинаяс да му вынмӧданторъяс. Бура муяс куйӧдалӧны.

Ыбпон сиктын (Ужга в. Сыктыв у.) эм видз-му уджалан артель «Ыбпончи». Сэні 26 шлен. Шленъясыс таво тулыснас выль ногӧн уджалӧм вылӧ торйӧдісны 5 десятина му. Став уджсӧ кӧсйӧны нуны агроном тшӧктӧм да индалӧм серти. Шуисны уджавны сідзи: быд шлен кутас уджавны да бурмӧдны (куйӧдавны) ассьыс му участоксӧ агроном индалӧм серти. Урожай босьтӧм бӧрын 15 прӧч. сетны общӧй фондӧ. Сійӧ сьӧм вылас лӧсьӧдавны-ньӧбавны видз-му уджалан машинаяс да му вынмӧданторъяс (минеральные удобрения).

Артельса шленъяс да агроном кӧсйысисны уджавны бура, ӧтвылысь кывзыны да вӧчны агроном тшӧктӧм серти.

Тулыснас артельыс кӧдзис нёль му: ӧти му сюӧн, мӧд идйӧн турун сорӧн (бобӧнянь), коймӧдӧ корнеплодъяс, нёльӧдӧ шабді. Сэсся куим му таво колисны кӧдзтӧг.

Куйӧдалісны муяссӧ картавывса куйӧдӧн да гулю-чавкан куйӧдӧн (чукӧртісны вичко вевт улысь). Гулю-чавкан куйӧдсӧ войдӧр изісны (мельничасӧ вӧчисны шленъясыс), сэсся койисны ӧти пунтӧн быд квадрата сыв му вылӧ.

Ӧткымын шленъяс сідзсӧ вынмӧдісны ассьыныс мукӧд муяссӧ.

Корреспондент.