ВИДЗӦЙ ПОРСЬЯСТӦ ВИСЬМӦМЫСЬ

Сыктывдінкарын заводитчис паськавны порсьяс пӧвстын висьӧм. Висьӧмыс шусьӧ «Бациллярная рожа свиней». Висьӧмсӧ зэв сьӧкыд лечитныс. Нуӧдӧ висьӧмыс зэв чорыда. Тайӧ висьӧмсьыс мукӧдінъясын кувлӧ сё висьмӧм порсь пиысь ветымын куимсянь кӧкъямысдас порсьӧдз. Висьмӧны том дай пӧрысь порсьяс. Тайӧ висьӧмыс зэв ёна вуджӧ. Ӧти порсьсянь мӧдӧ вуджӧмӧн вермас паськавны став сикт пасьта; мукӧддырйиыс висьӧмыс паськалӧ быдса уездъяс, обласьтъяс пасьта. Та серти позьӧ гӧгӧрвоны, мыйта убытка вермас вайны висьӧмыс став крестьяна кӧзяйстволы.

Тайӧ висьӧмыс мукӧд скӧтлы оз вудж.

Ми шуим нин, тайӧ висьӧмсьыс зэв сьӧкыд лечитныс. Медся нин сьӧкыд, кор сёрӧн шыасьӧны скӧт лечитысь врач дінӧ либӧ пельшӧр дінӧ. Водзджык кӧ заводитан лечитны висьысь порсьтӧ, сэки сӧмын позьӧ виччысьны бурдӧм. Сы вӧсна, мыйӧн казялан порсьлысь висьӧм, пырысьтӧм-пыр колӧ мунны скӧт лечитысь пельшӧр либӧ врач дінӧ.

Висьӧмсӧ позьӧ тӧдны со мый серти: 1) порсь кӧ куйлӧ пыр (быттьӧ мудзӧма), вӧрзьӧдчывтӧг, юрсӧ водзӧ нюжӧдӧмӧн, 2) сёйны-юны оз кут, 3) лун-мӧд мысти висьмӧм бӧрас туша кузяыс, медсясӧ нин морӧс бокъясас, мышку вылас, бӧр кокъясас да голяас лоӧны сімгӧрд либӧ пемыдлӧз гӧгрӧс чутъяс, 4) сэсся порсьыслӧн лоӧ запор, синъясыс гӧрдӧдасны (гырдӧсь лоӧны), восӧдны моз кутас, бӧрас заводитчас мытитны.

Тайӧ ставыс лоӧ лун кык-куимӧн. Нёльӧд лунас порсьыд кулӧ нин. Шочиника олӧны лун кӧкъямысӧдз. Мукӧддырйиыс быттьӧ порсьыд бурдлас нин (сідзсӧ порсьпиянджык), сэсся лун 6−12 мысти друг бара висьмасны: пӧдӧны, кызӧны, сэсся и кулӧны.

Мед висьӧмыс оз паськав, колӧ со мый вӧчны:

1) Висьысь порсьясӧс видзны торйӧн дзоньвидза порсьясысь.

2) Сэтчӧ оз ков лэдзны мукӧд скӧтӧс да бокӧвӧй йӧзӧс. Найӧ асланыс кокъяснас вермасны висьӧмсӧ вуджӧдны мукӧд порсьяс вылӧ.

3) Скӧт пельшӧр либӧ врач видлавтӧг оз ков начкавны порсьясӧс.

Сэсся бурджык кутны став порсьсӧ (дзоньвидзасӧ и) карта вылын, не лэдзны найӧс ывла вылын ветлӧдлыны.

Скӧт лечитан юкӧд.