НЫВБАБАЯСЛӦН ПРАВАЫС ВИДЗ-МУ ЗАКОН СЕРТИ

1) Нывбаба вермӧ видз-му босьтны земельнӧй общество пыр либӧ видз-му юкӧдъяс пыр мужчинакӧд ӧткодя, кӧсйӧ кӧ сійӧ ачыс нуӧдны да вермас кӧ нуӧднысӧ кӧзяйствосӧ.

2) Верӧс сайӧ мунӧм бӧрти нывбаба лыддьыссьӧ мужик семьяас ӧтыджда шленӧн мукӧдыскӧд. Сідзжӧ некутшӧм торъя гижӧдъяс корсьтӧг пырӧ земельнӧй обществоас, кӧні лыддьыссьӧ мужикыс. Сэтшӧм права жӧ сетсьӧ мужиклы, пырӧ кӧ сійӧ баба семья пытшкас. Сӧмын мед мужикыс ачыс кутас уджавны баба кӧзяйствоас-а.

3) Нывбаба мужиккӧд вермӧ лоны ӧтвыйын быд видз-му йылысь лӧсьӧдчигъясӧн земельнӧй обществоын. Колӧ зільны, мед верӧс сайӧ мунӧм нывбабаяс дай 18 арӧсысь гырысьджык нывъяс волывлісны быд скод вылӧ да сёрнитісны тшӧтш быд делӧ кузя.

4) Нывбабалӧн праваыс му вылӧ да ӧтласа кӧлуй вылӧ дзик ӧткодь мужикыскӧд (верӧс сайӧ кӧ мунӧма), батьыскӧд (гортас на кӧ) да сідз водзӧ. Аслас кӧлуйыс нывбабалӧн ӧтнаслӧн лыддьыссьӧ.

5) Нывбаба вермас нуӧдны став кӧзяйствосӧ, вермас юравны кӧзяйствоас. Верӧсыс кӧ сылӧн кутас мотайтны овмӧссӧ либӧ торкны кӧзяйство уджсӧ, волисполком лӧсьӧдӧм серти нывбаба вермас лоны юрӧн кӧзяйствоас.

6) Семья кост юксигӧн нывбабалы сетсьӧ видз-му да ӧтувъя кӧлуй. Сылӧн пайыс мужикъяс пайысь ичӧтджык оз вермы лоны.

7) Нывбаба кӧ юксьӧ мужикыскӧд, сійӧ вермас корны (медся нин ёна кор сы дінӧ кольӧны челядьыс), мед сійӧс колясны кӧреннӧй кӧзяйствоас, а мужиксӧ торйӧдісны мӧд кӧзяйствоӧ.

8) Нывбаба вермас лоны земельнӧй комиссияын шленын. Колӧ зільны земельнӧй комиссияясас нывбабаяссӧ унджыкӧс пыртны, мед сэтӧні налысь делӧ лӧсьӧдалігӧн эз ӧбӧдитны.

А. Л.