ЛОӦ ВӦЛӦСЬТУВСА РЕВИЗИОННӦЙ КОМИССИЯ

Волисполкомъяс удж йылысь мукӧддырйи вӧлӧсьтувса йӧзыс вӧлі омӧля тӧдлӧны, сылысь уджсӧ оз аддзыны. Волисполкомъяс удж йывсьыс йӧз водзын вӧлі висьтавлывлӧ шоча либӧ весиг ньӧти оз, вӧлӧсьтувса съездъяс вылын кындзи. Ӧні, сӧвет власьтӧн шуӧм мысти паськыдджыка крестьянаӧс сӧвет уджӧ кыскӧм йылысь, волисполкомъяс сӧмын тшӧкыдджыка кутісны вӧчлывлыны докладъяс скодъяс вылын асланыс удж йывсьыс.

Та кындзи, медым ещӧ на паськыдджыка йӧзӧс кыскыны сӧветъяс уджӧ, медым сӧветъяслӧн уджыс ещӧ на ёна тыдалӧ вӧлі йӧзлы, Ставроссияса Сӧветъяслӧн 12-ӧд съездыс шуис: колӧ пӧ лӧсьӧдны вӧлӧсьтъясӧ ревизионнӧй комиссияяс. Татшӧм комиссияясыс кутасны бӧрйыссьыны вӧлӧсьтувса съездъяс вылын.

Ревизионнӧй комиссияяс кутасны видзӧдны волисполкомлысь уджалӧмсӧ, видзӧдны, кытчӧ волисполкомыс вӧлӧсьтувса бюджетсьыс сьӧмсӧ видзӧ, индыны, волисполкомыс кӧ ачыс оз удит либӧ оз кӧсйы кыті-мый колӧ вӧлӧсьтын вӧчны: посъяс дзоньмӧдны, туйяс лӧсьӧдны, с.в. Став уджсӧ ассьыс ревизионнӧй комиссия кутас нуӧдны выліджык сӧветъясӧн туйдӧдӧм кузя, видлавны волисполкомлысь уджсӧ финанс удж нуӧданінъяс пыр.

Ӧні Центральнӧй Исполнительнӧй Комитет съезд шуӧм кузя лӧсьӧдӧ туйдӧд вӧлӧсьтувса ревизионнӧй комиссияяс йылысь, дай тайӧ туйдӧдыс недыр мысти лоӧ йӧзӧдӧма.

Крестьяналы Сӧвет власьт сетіс ещӧ на ыджыд кокньӧд Сӧветъяс уджӧ матысмӧм вӧсна. Крестьяна пыр кутасны видзӧдны да тӧдны сӧветъясын уджалӧм йылысь асланысӧн бӧрйӧм ревизионнӧй комиссияяс пыр.

Н. П.