МУ ВЕШТАЛӦМ ЛОӦ

Важ ногӧн, куим переменаӧн омӧлик важ сяма кӧлуйӧн уджалӧмӧн видз-муяс вайӧны ичӧт доход. Тайӧс крестьянаяс казялісны, найӧ корсьӧны туй эновтчыны важ ногӧн видз-му уджалӧмысь, заводитчӧны бурджык ногӧн босьтчыны видз-мусӧ вӧдитӧмас. Медся ёна тайӧ тӧдчӧ таво. Миян газетын пӧшти быд номерын эм юӧръяс — сэні тавося кӧйдыс весалісны, сэні лӧсьӧдалісны унаӧн плугъяс, видз-му уджалан машинаяс, сэні кӧдзисны турун, сэні уджалӧны агроном велӧдӧм серти.

Сӧмын татшӧм ичӧтика выль нога видз-му уджалӧмсӧ сиктъясын оз нуӧдны став крестьянаыс, нуӧдӧны этшаджык йӧзыс на либӧ ӧткӧн, либӧ кымынӧнкӧ артельтчӧмӧн торъя участок му вылын.

Медъёнасӧ падмӧдӧ паськыдджыка бурмӧдны видз-му уджалӧмсӧ миян видз-мунымӧс лӧсьӧдтӧмыс (неустройство). Та кузя уналаын эськӧ крестьяна зільӧны, да сьӧмныс уджсӧ нуӧдӧм вылӧ абу, дай удж нуӧдысьыс ӧтпырйӧсӧ быдлаӧ оз тырмы. Неважӧнся Став Республикаяс Союзлӧн Сӧветъяс 3-ӧд съезд шуис помавны землеустройство дас воӧн. Сэсся сійӧ съездыс шуӧм серти Сӧвет правительство сетіс куим миллион шайт гӧль крестьяналы землеустройство нуӧдны отсӧг вылӧ, сетіс ещӧ квайт миллион шайт удждавлыны тайӧ уджсӧ нуӧдӧм вылӧ. Сідзкӧ землеустройство удж кутас мунны план серти вочасӧн-вочасӧн вӧлӧсьтъясын.

Сэсся ёна омӧль да сьӧкыд вӧлі уджавны да бурмӧдны видз-мусӧ гӧльджык крестьяналы видз-му вештавтӧм (юклытӧм) вӧсна. Миян обласьтын видз-муяс вешталӧмъяс революция бӧрын эз на вӧвлыны. Гӧльджык крестьяна скодъяс вылын та йылысь эськӧ кыпӧдласны вӧлі сёрнитӧ, да быд ногӧн зільӧны вӧлі падмӧдны, не лэдзны тайӧ уджсӧ судзсянаджык, уна видз-муа крестьянаяс. Медбӧръя Обласьтувса Исполком пленум вылын Айбабин ёрт висьталіс, видз-му вешталӧм пӧ позьӧ вӧчны, весиг сиктас кӧ ӧти крестьянин корӧ сійӧс вӧчны. Сідзкӧ му вешталӧм, кӧні сэтшӧм уджсӧ нуӧдӧмыс колӧ, лоӧ тайӧ воясӧ жӧ. Сӧмын тайӧ уджсӧ нуӧдны колӧ сідзи, медым сы бӧрти позьӧ вӧлі нуӧдны, сувтӧдны видз-му уджалӧмсӧ бурджыка. Колӧ му вешталігӧн бырӧдны посньыдик пельын муяс, посни йӧръяс, колӧ ӧти мортлы муяссӧ сетавны ӧтчукӧрысьджык, матысьджык мӧда-мӧдсьыс.

Татшӧм ногӧн му вешталӧм удж нуӧдӧмӧн крестьяналы позяс ӧдйӧджык вуджны бурджык ногӧн видз-му уджалӧмӧ, паськыдджыка восьтам туй крестьянинлы, коді босьтчис дай босьтчӧ выль ногӧн видз-му вӧдитӧмӧ, лӧсьӧдны судзсянаӧн олан кӧзяйство.